Zgjedhjet vendore, Celibashi: Të harmonizohet Kodi Zgjedhor me hartën e re territoriale

Kreu i Komisionit Qendror të Zgjedhjeve, Ilirjan Celibashi, kërkoi harmonizimin e Kodit Zgjedhor me ndarjen e re administrative-territoriale, si dhe zgjerimin e votimit dhe numërimit elektronik në zgjedhjet vendore të 9 majit.

Në një deklaratë për mediat, Celibashi theksoi se ndryshimet në Kodin Zgjedhor janë të domosdoshme për të përshtatur përfaqësimin në këshillat bashkiakë me organizimin e ri territorial. Ai kërkoi angazhimin e partive politike dhe Kuvendit për realizimin e këtyre ndryshimeve, në përputhje edhe me rekomandimet e OSBE/ODIHR.

Sa i përket votimit dhe numërimit elektronik, kreu i KQZ-së ritheksoi se institucioni synon shtrirjen e tij në sa më shumë bashki, por nënvizoi se për këtë çështje nevojitet konsensus mes forcave politike.

I pyetur për kundërshtimet e Partisë Demokratike, Celibashi deklaroi se KQZ-ja nuk është palë në këtë debat dhe se mazhoranca duhet të zhvillojë komunikim me opozitën për të arritur një marrëveshje.

Ai hodhi poshtë gjithashtu pretendimet e PD-së për mungesën e sigurisë së sistemit elektronik, duke deklaruar se argumentet e ngritura nga opozita nuk qëndrojnë.

Lidhur me paralajmërimin e PD-së për ta çuar hartën e re territoriale në Gjykatën Kushtetuese, Celibashi tha se KQZ-ja do të vijojë përgatitjet për zgjedhjet mbi bazën e ligjit aktualisht në fuqi.