Ekonomia amerikane u rrit me ritmin më të shpejtë në një vit gjatë tremujorit të tretë, duke shënuar rritje prej 3.4%, mbi pritshmëritë e analistëve prej 3.2%.
Sipas të dhënave të publikuara nga Departamenti i Tregtisë, rritja u mbështet kryesisht nga konsumi i qëndrueshëm i familjeve dhe investimet e fuqishme të bizneseve në teknologjinë e inteligjencës artificiale (AI).
Shpenzimet konsumatore, që përbëjnë më shumë se dy të tretat e ekonomisë amerikane, u rritën me 3.8%, të nxitura kryesisht nga shërbimet, përfshirë kujdesin shëndetësor, restorantet, baret dhe hotelerinë.
Ndërkohë, investimet e bizneseve në pajisje u rritën me 20.9%, ritmi më i lartë që nga tremujori i tretë i vitit 2020. Një kontribut të rëndësishëm dhanë pajisjet kompjuterike, programet kompjuterike dhe kërkimi e zhvillimi, të lidhura me zgjerimin e teknologjisë AI.
Megjithatë, rritja e fortë ekonomike shoqërohet me shqetësime për inflacionin. Përshpejtimi i çmimeve në shtator ka shtuar pritshmëritë që Rezerva Federale të shqyrtojë një rritje të normave të interesit në dhjetor.
Pavarësisht ecurisë pozitive të ekonomisë, ekspertët vënë në dukje se përfitimet nga rritja nuk shpërndahen në mënyrë të barabartë dhe se pagat e shumë punonjësve vijojnë të mbeten pas rritjes së çmimeve.
