Palokaj për Raportin e Progresit: Asgjë befasuese për Kosovën

Korrespodenti i KOHËS në Bruksel, Augustin Palokaj, ka thënë se gjetjet e Raportit të Progresit të Komisionit Evropian për Kosovën nuk janë befasuese, pasi vendi gjatë periudhës që mbulon raporti nuk ka shënuar përparim të dukshëm në reformat e kërkuara.

Palokaj ka vlerësuar se, ndonëse nuk ka kthim prapa, Kosova nuk ka arritur progresin e duhur në shumë fusha, ndërsa në disa të tjera është shënuar vetëm progres i limituar.

Ai ka thënë se raporti, i cili përmban rreth 100 faqe, duhet të lexohet në tërësi për të nxjerrë një vlerësim të saktë, por se krahasimi me raportet e viteve të kaluara dhe me ato të vendeve të tjera jep një pasqyrë të përgjithshme për gjendjen në Kosovë.

“Nuk është asgjë befasuese për Kosovën dhe askënd tjetër që Raporti i Progresit konstaton se, në mungesë të institucioneve funksionale në Kosovë, periudha që mbulon ky raport nuk ka shënuar shumë progres. Nuk ka kthim prapa, por pak a shumë është gjendje reale e mungesës së progresit të duhur. Aty-këtu ka progres të limituar, por nuk është notë e mirë”, ka thënë Palokaj në “Konfront” të KTV-së. 

VIDEO:

Sipas tij, raporti nuk e paraqet Kosovën si problem serioz, në dallim nga Gjeorgjia dhe Serbia, por evidenton një sërë çështjesh që është dashur të adresoheshin përmes reformave.

Edhe Arbëri 8 o. më parë Në sytë e BE-së, Kosova humbi një tjetër vit

Palokaj ka theksuar se mungesa e një qeverie funksionale dhe e një Kuvendi që do të mundësonte miratimin e ligjeve ka penguar zbatimin e reformave të kërkuara nga Bashkimi Evropian.

Ai ka rikujtuar se Raporti i Progresit zakonisht e vlerëson përparimin e një vendi duke krahasuar të arriturat me rekomandimet që Komisioni Evropian i kishte dhënë në raportin paraprak.