Komisionerja e Bashkimit Evropian për Zgjerimin, Marta Kos, ka vlerësuar angazhimin dhe përparimin e Shqipërisë në procesin e integrimit evropian, por ka theksuar se vendi duhet të vijojë zbatimin e reformave, veçanërisht në fushën e shtetit të së drejtës, pavarësisë së gjyqësorit dhe lirisë së medias.
Gjatë fjalës në Parlamentin Evropian, ku prezantoi paketën e zgjerimit të Bashkimit Evropian, Kos bëri të ditur se Shqipëria ka mbyllur tashmë katër kapituj negociues dhe synon të mbyllë përkohësisht edhe kapituj të tjerë. Objektivi i vendosur nga vendi është përfundimi i negociatave të anëtarësimit deri në vitin 2027.
Komisionerja nënvizoi se përparimi në negociata duhet të shoqërohet me rezultate konkrete në reformat kryesore. Ajo veçoi respektimin e të drejtave themelore, garantimin e pavarësisë së drejtësisë dhe mbrojtjen e lirisë së medias si fusha ku Shqipëria duhet të ruajë vëmendjen.
Një tjetër çështje e ngritur nga Kos ishte mbrojtja e mjedisit, të cilën e cilësoi si një prioritet për vendin. Sipas saj, reformat në këtë fushë nuk lidhen vetëm me përmbushjen e kritereve të anëtarësimit në BE, por kanë rëndësi edhe për shoqërinë dhe qytetarët shqiptarë.
Ajo theksoi gjithashtu se përfshirja e të gjithë shoqërisë është e rëndësishme për suksesin e procesit të integrimit, ndërsa kujtoi se zgjerimi i Bashkimit Evropian synon të forcojë paqen, sigurinë dhe prosperitetin në Union.
Deklaratat e komisioneres vijnë në një periudhë kur në Shqipëri vijojnë protestat kundër qeverisë, ndërsa çështjet e korrupsionit, përgjegjësisë politike, funksionimit të institucioneve dhe sundimit të ligjit janë pjesë e debatit publik.
Kos vlerësoi hapat e ndërmarrë nga Shqipëria në procesin negociues, por theksoi se përmbushja e reformave mbetet thelbësore për avancimin drejt anëtarësimit në Bashkimin Evropian.
