Çmimet e ushqimeve në Europë kanë shënuar rritje të moderuar gjatë këtij viti, por produktet e freskëta po bëhen gjithnjë e më të shtrenjta.
Sipas të dhënave të fundit, në tetor çmimet e ushqimeve të papërpunuara në Eurozonë u rritën me 4.6% krahasuar me një vit më parë, nga 2.7% që ishte rritja në gusht. Në Francë, produktet e freskëta u shtrenjtuan me 8%.
Italia është një nga rastet më të dukshme të kësaj tendence. Në tetor, çmimet e ushqimeve të papërpunuara u rritën me 7.5% në bazë vjetore. Situata u rëndua edhe nga bllokimi i rrugëve dhe porteve në jug të vendit për rreth dy javë, nga shoferët e kamionëve që protestonin kundër kostos së naftës. Kjo shkaktoi ndërprerje të furnizimeve dhe boshatisje të rafteve me mish, qumësht të freskët, fruta dhe ujë të ambalazhuar në disa rajone.
Në nivelin e Bashkimit Europian, të dhënat e shtatorit, të cilat përfshijnë të gjitha vendet anëtare, tregojnë se Qiproja kryeson rritjen e çmimeve të ushqimeve dhe pijeve joalkoolike me 4%. Pas saj renditen Spanja me 2.7%, Rumania me 2.6%, Malta me 2.5% dhe Portugalia me 2.4%.
Në anën tjetër, në 14 nga 27 vendet e BE-së, ushqimet rezultuan më të lira se një vit më parë. Ulja më e madhe u regjistrua në Suedi, me 6.3%, pas përgjysmimit të TVSH-së për ushqimet nga 12% në 6%, masë që hyri në fuqi më 1 prill dhe do të zbatohet deri në fund të vitit 2027. Ulje u shënuan edhe në Letoni, Hungari dhe Çeki.
Megjithatë, krahasuar me shtatorin 2021, ushqimet në Bashkimin Europian janë shtrenjtuar me rreth një të tretën. Në Hungari rritja ka kaluar 50%, ndërsa në Bullgari, Estoni dhe Rumani është gjithashtu mbi këtë nivel.
Ekonomistët parashikojnë vijimin e rritjes së inflacionit në muajt e ardhshëm. Sipas Pantheon Macroeconomics, inflacioni në Eurozonë mund të arrijë kulmin prej 4.5% në janar, ndërsa pritet që Banka Qendrore Europiane të rrisë normat e interesit në dhjetor. Rritja e çmimeve të ushqimeve pritet të rëndojë më tej buxhetet familjare, në një periudhë kur familjet përballen edhe me faturat më të larta të ngrohjes gjatë dimrit.
