Asnjë votë pro buxhetit të Macron në Francë, 458 deputetë votojnë kundër tij

Deputetët francezë kanë rrëzuar projektbuxhetin e shtetit për vitin 2027 në lexim të parë, duke thelluar ngërçin politik dhe financiar në vend, pak muaj para zgjedhjeve presidenciale. Projektligji u kundërshtua me 458 vota kundër, asnjë pro dhe dy abstenime.

Kundër projektbuxhetit votuan të gjitha forcat politike, përfshirë edhe deputetët që mbështesin qeverinë e presidentit Emmanuel Macron. Opozita kundërshtoi masat e propozuara, ndërsa mazhoranca shprehu shqetësimin për ndryshimet që, sipas saj, kanë deformuar projektin fillestar.

Projektbuxheti do t’i rikthehet Senatit në versionin fillestar dhe do të shqyrtohet sërish nga 20 nëntori. Qeveria e kryeministrit Sébastien Lecornu synon të arrijë një kompromis gjatë muajit dhjetor, përpara rikthimit të tij në Asamblenë Kombëtare.

Plani fillestar parashikonte uljen e deficitit publik në 5% të PBB-së në vitin 2027, nga 5.4% këtë vit. Megjithatë, deputetët hoqën disa masa kursimi, përfshirë shkurtimet e lehtësive tatimore për pensionistët dhe organizatat, si dhe rritjen e taksave për kompanitë e mëdha.

Situata ekonomike mbetet e vështirë, me një tkurrje prej 0.1% të PBB-së në tremujorin e tretë dhe rritje të kostos së huamarrjes së shtetit. Ndërkohë, disa deputetë dyshojnë se qeveria po fiton kohë për të miratuar buxhetin përmes një akti ekzekutiv pas 18 dhjetorit, duke shmangur një votim të ri parlamentar.