Një shtetas shqiptar 32-vjeçar është arrestuar në Occhiobello të Italisë, pasi dyshohet se është kthyer në vend pavarësisht ndalesës pesëvjeçare për hyrje, të vendosur pas dëbimit të tij.
Sipas BTZ, shqiptari ishte dëbuar nga Italia në maj të vitit 2026, ndërsa ndaj tij ishte vendosur ndalesa për t'u kthyer deri në vitin 2031.
Rasti u zbulua gjatë kontrolleve të zakonshme të territorit nga karabinierët e Occhiobellos, të cilët ndaluan një automjet me dy persona të huaj brenda.
Për shkak të një problemi të përkohshëm teknik me sistemet informatike të policisë, verifikimi i dokumentacionit të tyre përfundoi vetëm disa orë më vonë, transmeton Telegrafi.
Kontrollet në bazat e të dhënave të autoriteteve italiane zbuluan se pasagjeri 32-vjeçar kishte qenë subjekt i një vendimi dëbimi, të nxjerrë në dhjetor të vitit 2025 nga prefekti dhe kuestori i Ferrarës.
Pas konstatimit se ai ishte kthyer në Itali pa autorizimin përkatës, karabinierët e gjetën në banesën e një familjari dhe e arrestuan nën dyshimin për shkelje të rregullave të emigracionit.
Megjithatë, Prokuroria e Rovigos urdhëroi lirimin e tij në pritje të seancës për vërtetimin e arrestimit.
Ky vendim u mor pasi 32-vjeçari rezulton se është në procedurë për mbrojtje ndërkombëtare dhe se vendimi i dëbimit mund të jetë pezulluar deri në përfundimin e shqyrtimit të kërkesës së tij.
Autoritetet italiane pritet të kryejnë verifikime të mëtejshme për statusin e procedurës së mbrojtjes ndërkombëtare dhe vlefshmërinë e vendimit të dëbimit./Telegrafi/
