Gjashtë persona janë arrestuar në Poloni, nën dyshimin se kanë spiunuar në favor të Rusisë dhe kanë furnizuar ushtrinë ruse me komponentë që përdoren për prodhimin e municioneve dhe sistemeve të armatimit.

Lajmi u bë i ditur nga koordinatori i shërbimeve speciale polake, Tomasz Siemoniak, sipas të cilit në mesin e të arrestuarve janë pesë shtetas polakë, të moshës 25 deri në 52 vjeç, si dhe një shtetas rus 37-vjeçar.

Katër prej tyre, përfshirë shtetasin rus, janë akuzuar për spiunazh dhe janë lënë në paraburgim për tre muaj. Sipas Agjencisë së Sigurisë së Brendshme të Polonisë (ABW), grupi dyshohet se i ka siguruar Rusisë sasi të konsiderueshme komponentësh me përdorim ushtarak, të nevojshëm për prodhimin e municioneve dhe sistemeve të armëve.

Hetimet kanë zbuluar se aktiviteti i dyshuar ka nisur në qershor të vitit 2023 dhe ka vijuar deri në dhjetor 2025, duke u shtrirë në Poloni, Lituani dhe Rusi. Të dyshuarit porosisnin dhe blinin komponentët, organizonin grumbullimin e tyre dhe më pas transportimin drejt rajonit rus të Kaliningradit.

Për të kaluar kontrollet kufitare, ata dyshohet se përdornin automjete të pajisura me hapësira të fshehta. Disa nga dërgesat u sekuestruan nga autoritetet kufitare polake. Mes mallrave të tregtuara në mënyrë të paligjshme kishte edhe komponentë municionesh, si gëzhoja dhe predha.

Sipas prokurorisë, vlera e përgjithshme e komponentëve të blerë dhe transportuar drejt Rusisë kalon dy milionë zloty polake, ekuivalente me rreth 455 mijë euro.

Përveç akuzave për spiunazh, katër të dyshuarit përballen edhe me dyshimin për veprimtari në interes të shërbimeve sekrete ruse kundër Republikës së Polonisë. Autoritetet kanë vijuar hetimet për të zbardhur të gjithë përmasat e aktivitetit të grupit dhe për të identifikuar persona të tjerë të mundshëm të përfshirë.

Polonia, anëtare e NATO-s dhe Bashkimit Evropian, ka akuzuar vazhdimisht Moskën për organizimin e akteve të sabotazhit në territorin e saj që nga nisja e pushtimit në shkallë të plotë të Ukrainës në vitin 2022.