Ministri i Punëve të Jashtme dhe Tregtisë së Jashtme, Timço Mucunski, foli për raportin e fundit të Komisionit Evropian, reformat dhe sfidat e integrimit evropian në një intervistë për edicionin informativ të televizionit Sitel.
Sipas tij, raporti ofron një vlerësim objektiv e realist të situatës në vend lidhur me integrimin në BE. Në të evidentohen përparime në disa fusha, por edhe nevoja për më shumë punë në të tjera.
Të lidhura
None found
“Nuk do t’i quaja kritika, por udhëzime për hapat që duhet të ndërmarrim për t’u përmirësuar. Raporti është në interesin tonë. Duhet ta shohim jo si detyrim ndaj Bashkimit Evropian, por ndaj qytetarëve tanë, sepse synojmë standarde të larta dhe prej vitesh investojmë kohë e burime të konsiderueshme për to”, u shpreh Mucunski.
Ministri tha se vendi ka marrë për disa vite radhazi vlerësimet më të larta për politikën e jashtme, sigurinë dhe mbrojtjen. Ai theksoi se këto vlerësime lidhen si me veprimtarinë ndërkombëtare, ashtu edhe me orientimin strategjik të shtetit.
Për reformat në drejtësi dhe luftën kundër korrupsionit, Mucunski vuri në dukje se përgjegjësia nuk i takon vetëm pushtetit ekzekutiv. “Nuk ka rëndësi vetëm cilat ligje miraton Qeveria, por edhe mënyra se si zbatohen dhe rezultatet konkrete që arrijnë institucionet, veçanërisht gjyqësori në luftën kundër korrupsionit të nivelit të lartë”, tha ai.
Duke iu referuar vlerësimeve politike për raportin, ai kërkoi që vëmendja të përqendrohet te përmbajtja dhe te konstatimet e Bashkimit Evropian.
Mucunski shprehu vlerësim për mekanizmat e rinj të integrimit gradual, procesin e bazuar në meritë dhe përpjekjet për të kufizuar ndikimin e çështjeve dypalëshe në zgjerimin e BE-së.
“Gjatë rrugëtimit tonë drejt integrimit evropian kemi dëgjuar shumë fjalë inkurajuese dhe kemi folur shpesh për dritare mundësish. Tani presim angazhim dhe rezultate të përbashkëta. Nuk pretendojmë se vetëm Bashkimi Evropian duhet të japë rezultate për ne. Edhe ne duhet të angazhohemi, të zbatojmë reformat dhe të sigurojmë një kornizë të parashikueshme e të sigurt për rrugën tonë drejt integrimit”, theksoi ministri.
Për çështjet e pazgjidhura në procesin evropian, ai tha se zgjidhjet duhet të mbështeten në parime të qarta dhe se nuk duhen imponuar afate fikse.
“Nuk kemi premtuar se do ta zgjidhim çështjen brenda gjashtë muajve apo një viti. Po ecim hap pas hapi, jo vetëm për të përmirësuar gjendjen, por edhe për të rikthyer disa pozicione që më parë nuk i kemi pasur. Megjithatë, nuk heqim dorë nga integrimi evropian. Këtë e tregojnë si deklaratat tona, ashtu edhe veprimet konkrete”, deklaroi Mucunski.
Ai shtoi se vendimmarrja duhet të marrë parasysh pasojat e mundshme dhe pritshmëritë që mund të lindin më vonë gjatë procesit.
“Nuk jemi të gatshëm të hyjmë në mënyrë naive, pa i peshuar pasojat, në një proces për të cilin kemi të dhëna të drejtpërdrejta se pas një hapi mund të vijnë kërkesa të tjera. Këto procese janë të vështira dhe zgjasin shumë”, tha Mucunski.
Sipas ministrit, institucionet evropiane dhe shtetet anëtare duhet të njohin si mbështetjen e gjerë të shoqërisë për integrimin në BE, ashtu edhe angazhimin e Qeverisë për vlerat evropiane.
“Zbatimi i vlerave evropiane përfshin mirëkuptimin e ndërsjellë, respektimin e identitetit të tjetrit, të dallimeve gjuhësore dhe të kulturës. Zgjidhja mund të gjendet gjithmonë, nëse pala tjetër ka dëshirë dhe vullnet”, u shpreh ai.
Mucunski theksoi se reformat e brendshme duhet të zhvillohen krahas zgjidhjes së çështjeve të hapura politike, ndërsa përmbushja e kritereve të BE-së mbetet element thelbësor i procesit.
“Duhet të gjejmë zgjidhje dhe do të punojmë për këtë, por nuk duhet ta kemi si imperativ arritjen e një marrëveshjeje me çdo kusht”, përfundoi Mucunski.
