Dy kuintalë e gjysmë kokainë nga Shqipëria, 8 kg lingota ari/ Detaje nga operacioni Caveau 38

Nga Daniele De Salvo, IL GIORNO

Rreth 240 kilogramë kokainë nga Shqipëria drejt Italisë dhe 14 milionë euro para të gatshme të transferuara nga Italia drejt Shqipërisë.

Dhe më pas, tetë kilogramë shufra ari, droga të tjera dhe shuma të tjera parash.

Efektivët e Guardia di Finanza-s në Lecco, me autorizimin e prokurorëve të Antimafias pranë Drejtorisë së Antimafias së Milanos (DDA), kanë ekzekutuar një sekuestrim parandalues urgjent ndaj dy shoqërive tregtare në Lecco.

Ato shërbenin si kasafortë për trafikantë ndërkombëtarë droge që vepronin mes Holandës, Gjermanisë, Italisë dhe Shqipërisë. Pjesa dërrmuese e trafikantëve ishin shqiptarë, ndërsa paratë pastroheshin pikërisht në Itali.

Në total, janë vënë nën hetim 52 persona, si dhe pronarët dhe administratorët e dy shoqërive.

Në operacionin e koduar “Caveau 38” morën pjesë edhe hetuesit e SPAK-ut në Tiranë, prokurorisë së posaçme shqiptare kundër krimit të organizuar dhe korrupsionit.

“Operacioni bëri të mundur identifikimin e anëtarëve të një organizate kriminale, të përbërë kryesisht nga shtetas shqiptarë, e përfshirë në trafikun ndërkombëtar të sasive të mëdha të kokainës, si dhe në grumbullimin dhe transferimin jashtë vendit të të ardhurave të përfituara nga ky aktivitet në formën e parave të gatshme”, shpjegon prokurori i distriktit, Marcello Viola.

Bëhet fjalë për 240 kilogramë kokainë të importuar dhe 14 milionë euro para të gatshme të transferuara jashtë vendit.

“Shumat e paligjshme pastroheshin edhe nëpërmjet blerjes së shufrave të arit”, thekson prokurori.

Financierët e Lecco-s kanë dokumentuar blerjen e të paktën tetë kilogramëve ar nga pronarët e një shoqërie me përgjegjësi të kufizuar (Srl), që ushtron aktivitet në përpunimin e metaleve të çmuara dhe ka seli në Milano dhe Alessandria.

Në Lecco, ndërkohë, ndodhej shoqëria që shërbente si kasafortë e grupit, përmes investimeve në pasuri të paluajtshme.

Punonjësit dhe bashkëpunëtorët e dy shoqërive nuk kishin dijeni për aktivitetet e paligjshme. Për këtë arsye, është caktuar një administrator gjyqësor, me qëllim shmangien e mbylljes së tyre.

Gjatë operacionit u arrestuan në flagrancë gjashtë persona, ndërsa u sekuestruan 1,5 milionë euro dhe 32 kilogramë kokainë, heroinë dhe marihuanë.