Dy persona kanë humbur jetën pasi një aeroplan i vogël është rrëzuar të premten pasdite në një autostradë pranë qytetit lindor të Magdeburgut, njoftoi policia për gazetën BILD, transmeton Anadolu.
“Avioni mori plotësisht flakë gjatë rrëzimit. Sipas informacioneve aktuale, ekipet e emergjencës nxorën nga rrënojat dy pasagjerë të vdekur”, tha një zëdhënës i policisë.
Në aksident nuk u përfshinë automjete të tjera. Shkaku i rrëzimit ende nuk është përcaktuar. Policia dhe shërbimet e emergjencës ndodhen në vendngjarje. Autostrada mbeti e mbyllur.
Fotografitë treguan zjarrfikësit duke shuar mbetjet e një avioni kuq e bardhë. Pjesë të mëdha të avionit u shkatërruan gjatë rrëzimit. Bishti i tij kishte mbetur në rrugë, ndërsa mbetje të djegura shiheshin në një argjinaturë.
Sipas portalit të gjurmimit të fluturimeve Flightradar, avioni duket se ishte i tipit Aerostyle Breezer, një aeroplan ultra i lehtë me dy ulëse. Raportohet se ai ishte i regjistruar në një klub të aviacionit në qytetin verior Kropp dhe ishte ngritur në orën 12:33 nga aeroporti i klubit.
