Prania dhe bashkëpunimi i 31 shteteve kontribuuese u vunë në pah gjatë aktivitetit që synon forcimin e qëndrueshmërisë fizike dhe unitetit mes kontingjenteve shumëkombëshe të KFOR-it.
Pjesëtarët e misionit të udhëhequr nga NATO, KFOR, kanë marrë pjesë në marshimin tradicional “DANCON March”, i cili është mbajtur në kampin “Novo Selo”.
Ky aktivitet, që rrjedh nga një traditë shumëvjeçare e Ushtrisë Daneze, përbën një sfidë të qëndrueshmërisë fizike, por njëkohësisht shërben edhe si mundësi për forcimin e bashkëpunimit dhe lidhjeve mes pjesëtarëve të kontingjenteve shumëkombëshe.
Sipas KFOR-it, aktiviteti ndër vite është shndërruar në një simbol të frymës së këtij misioni, ku 31 shtete kontribuuese bashkohen rreth një misioni dhe një qëllimi të përbashkët.
KFOR thekson se fuqia e misionit qëndron në unitetin e pjesëtarëve të tij, të cilët, përmes tejkalimit të sfidave dhe bashkëpunimit, dëshmojnë vendosmërinë për të ruajtur paqen dhe stabilitetin në rajon. /Telegrafi/
