Në hapjen e edicionit të katërt të “Swiss Medical School”, më 7 nëntor 2026, kryeministri Albin Kurti vlerësoi bashkëpunimin mes mjekëve shqiptarë në diasporë dhe profesionistëve të shëndetësisë në Kosovë.
Sipas Kurtit, gjatë vitit 2025, 171 mjekë u kthyen për të jetuar dhe punuar në Kosovë. Ai e cilësoi këtë një zhvillim pozitiv përballë largimit të profesionistëve shëndetësorë.
Të lidhura
None found
Kryeministri tha se Qeveria synon t’u ofrojë mjekëve kushte më të mira pune, pajisje bashkëkohore dhe mundësi të reja trajnimi.
Duke folur për investimet në shërbimet shëndetësore, Kurti përmendi mbi 5.5 milionë euro në Gjinekologji, rreth 1.45 milionë euro në Kardiologjinë Invazive të QKUK-së dhe mbi tre milionë euro në Neurokirurgji dhe Kirurgji Vaskulare.
Ai bëri të ditur se buxheti për Listën e Barnave Esenciale është rritur nga 35 milionë euro në vitin 2019 në 64 milionë euro këtë vit. Ndërkohë, buxheti për barnat e pacientëve onkologjikë është rritur nga 8 në 22 milionë euro.
Kurti vlerësoi edhe mjekët e diasporës që kthehen për të ligjëruar, për të trajnuar profesionistët e rinj dhe për të punuar me ekipet shëndetësore në Kosovë. Sipas tij, ky bashkëpunim duhet të vijojë edhe pas përfundimit të takimit.
