Bayern Munich ka marrë një fitore të rëndësishme në transfertë ndaj Mainz, duke triumfuar me rezultat 2-1 në javën e nëntë të Bundesligës.

Bavarezët siguruan tri pikët falë golave të Joshua Kimmich dhe talentit të ri Lennart Karl, duke konfirmuar edhe një herë formën e mirë.

Ndeshja nisi në mënyrën më të mirë për mysafirët, të cilët kaluan në epërsi që në minutën e 14-të.

Ishte Kimmich ai që realizoi një gol të bukur me goditje të saktë nga hyrja e zonës për 0-1.

Mainzi reagoi në minutën e 40-të, por goli i Jae-Sung Lee u anulua pas ndërhyrjes së VAR-it për pozicion jashtë loje.

Në pjesën e dytë, Bayern vazhdoi dominimin dhe në minutën e 57-të dyfishoi epërsinë.

Harry Kane asistoi për Lennart Karl, i cili nuk gaboi brenda zonës, duke shënuar për 0-2.

Bavarezët patën edhe disa mundësi të tjera për të thelluar rezultatin, por nuk arritën t'i konkretizonin rastet.

Në minutën e 86-të, Dayot Upamecano ishte shumë pranë golit, por goditja e tij me kokë u ndal nga traversa.

Mainzi arriti të ngushtonte rezultatin në minutat e fundit përmes Phillip Tietz, por koha nuk mjaftoi për një rikthim.

Kështu, Bayern Munich fitoi 2-1 dhe arkëtoi tri pikë shumë të rëndësishme në garën për titull.

Me këtë triumf, skuadra bavareze shkon në kuotën e 21 pikëve dhe vazhdon të mbajë kreun e Bundesligës pas nëntë javësh së bashku me Dortmundin.