Një situatë e pazakontë ka përfshirë futbollistin boshnjak Amar Dedic, i cili është gjendur në qendër të një ndërhyrjeje policore në Angli, pasi është parë duke mbajtur një hark dhe shigjeta pranë një rezervuari uji.
Mbrojtësi 24-vjeçar, sipas raportimeve, ndodhej së bashku me një mik në zonën e Military Road, kur prania e tyre me pajisjet në fjalë tërhoqi vëmendjen e një banori. I shqetësuar nga ajo që kishte parë, qytetari njoftoi menjëherë autoritetet.
Policia e Northumbria reagoi duke dërguar në zonë të paktën gjashtë automjete, mes të cilave dyshohet se kishte edhe njësi të specializuara për ndërhyrje të armatosura.
Pas një operacioni kontrolli, efektivët lokalizuan dhe ndaluan automjetin me të cilin udhëtonte futbollisti në Darras Hall, rreth 11 kilometra larg vendit ku ishte raportuar fillimisht incidenti.
Gjatë kontrollit të makinës, policia gjeti harkun dhe shigjetat, të cilat u sekuestruan për verifikime të mëtejshme. Dedic u mor në pyetje për të sqaruar arsyet e mbajtjes së këtyre pajisjeve.
Në vendin ku u ndalua automjeti u shfaqën gjithashtu portieri i Newcastle, Mark Gillespie, dhe ish-futbollisti i skuadrës, Paul Dummett. Të dy ndodheshin pranë zonës dhe ndaluan për të kuptuar situatën dhe për të ofruar ndihmë.
Sipas policisë, telefonata që sinjalizoi ngjarjen ishte regjistruar rreth orës 13:55 të së mërkurës. Nga kontrollet paraprake rezultoi se harku dhe shigjetat përdoreshin për qëllime argëtimi dhe se nuk ekzistonte ndonjë rrezik konkret për qytetarët.
Megjithëse autoritetet përjashtuan një kërcënim për sigurinë publike, verifikimet lidhur me rrethanat e incidentit vazhdojnë.
Ndërkohë, klubi i Newcastle nuk pritet të ndërmarrë masa disiplinore ndaj mbrojtësit boshnjak. Sipas raportimeve, Dedic është transferuar gjatë merkatos së verës nga Benfica për një shumë prej rreth 29.5 milionë eurosh dhe ka dhënë katër asiste në 11 ndeshje.
Pavarësisht përfshirjes në këtë episod të pazakontë, futbollisti pritet të jetë i gatshëm për takimin e radhës ndaj Fulhamit.