Influenceri holandez Tom van den Heuvel, i njohur në rrjetet sociale si Dutch Travel Maniac, i është bashkuar protestës së sotme në Tiranë, duke përcjellë edhe një mesazh për emigracionin dhe “ruajtjen e kulturës” shqiptare.
Van den Heuvel është bërë i njohur për përmbajtjen e tij ksenofobe dhe raciste, ku publikon video nga qytete të ndryshme europiane kundër emigrantëve. Mediat në Holandë dhe Belgjikë e kanë lidhur përmbajtjen e tij me narrativa të ekstremit të djathtë dhe kundër emigracionit.
Në një video të publikuar gjatë protestës në Tiranë, ai u drejtohet shqiptarëve duke i paralajmëruar për atë që, sipas tij, ka ndodhur në Europën Perëndimore për shkak të emigracionit.
“Kam dëgjuar nga shoku im se gjithnjë e më shumë emigrantë po hyjnë edhe në vendin tuaj, Shqipërinë”, thotë ai, duke shtuar se Shqipëria “ende ka kulturën dhe vlerat e veta”.
Influenceri u bën më pas thirrje shqiptarëve që të bëjnë “gjithçka” për ta mbrojtur kulturën e tyre.
“Nëse nuk e bëni, do të përfundoni njësoj si Europa Perëndimore dhe të gjithë e dimë si shkoi”, shprehet Dutch Travel Maniac.
Van den Heuvel ka ndërtuar një audiencë të madhe në YouTube me video që fokusohen shpesh te retorika kundër emigrantëve dhe ndryshimet demografike në qytetet europiane. Në fund të tetorit 2026 kanali i tij numëronte mbi 760 mijë abonentë.
