Ministri gjerman i Mbrojtjes, Boris Pistorius, ka deklaruar se Gjermania nuk mund të vazhdojë për momentin furnizimin e Ukrainës me sistemet e mbrojtjes ajrore “Patriot”, për shkak të rezervave të kufizuara ushtarake.
Sipas tij, vijimi i dërgesave do të rrezikonte krijimin e mungesave në arsenalin e vetë Gjermanisë, duke dobësuar kështu kapacitetet e saj mbrojtëse.
“Për momentin nuk mund të japim më ‘Patriot’ për Kievin”, theksoi Pistorius, duke nënvizuar se rezervat ushtarake gjermane kanë arritur në një nivel që kërkon më shumë kujdes në shpërndarjen e pajisjeve dhe sistemeve të mbrojtjes.
Kreu i Mbrojtjes gjermane shtoi se Berlini pret një angazhim më të madh nga partnerët ndërkombëtarë për të mbështetur Ukrainën, veçanërisht përmes furnizimit me sisteme të mbrojtjes ajrore.
Deklarata vjen në një kohë kur Ukraina ka nevojë të vazhdueshme për forcimin e mbrojtjes ajrore përballë sulmeve ruse. Ndërkohë, vendet perëndimore po përballen me vështirësi për të ruajtur njëkohësisht mbështetjen ushtarake për Kievin dhe kapacitetet e tyre mbrojtëse.