Vllaznia mundi Elbasanin në Shkodër në ndeshjen e javës së 11-të të “Abissnet Superiore”. Goli i Uldedajt vendosi takimin, pas të cilit trajneri i skuadrës fituese, Csaba Laszlo, foli për mediat.
Të lidhura
None found
Laszlo falënderoi për urimet dhe e cilësoi trepikëshin shumë të rëndësishëm, sidomos për besimin e ekipit pas barazimit në ndeshjen e mëparshme. Ai u shpreh i kënaqur me rezultatin, por vlerësoi edhe lojën e Elbasanit, duke pranuar se Vllaznia pati fat në disa situata.
Sipas trajnerit, ndeshja ishte e mirë nga ana taktike dhe lojtarët po kuptojnë gjithnjë e më shumë se në fushë nuk mjafton të luash me këmbë: duhet të përdorësh edhe mendjen. Gabimi, sipas tij, shfaqej kur ata ndiqnin topin dhe largoheshin nga detyrat që u ishin caktuar. Laszlo kërkoi që lojtarët të zbatonin udhëzimet e tij dhe tha se në këtë drejtim ekipi ka përparuar hap pas hapi.
Ai theksoi se Vllaznia nuk mund t’i fitojë të gjitha ndeshjet, por se përpiqet t’i përcjellë skuadrës besim. Trajneri shtoi se pas çdo takimi mbetet pa zë dhe bëri shaka se në stadium mund të kishin qenë 60-70 mijë tifozë. Pas kësaj fitoreje, sipas tij, ekipi e meriton një pushim, përpara se të përqendrohet te ndeshja e radhës.
Laszlo tha se ishte befasuar nga analiza, të cilën e mori si kompliment. Ai pranoi se gjatë 10 minutave të fundit ishte nervoz, sepse skuadra i la kundërshtarit shumë hapësira. Duke folur për sinkronizimin në fushë pas ndërrimeve, ai shpjegoi se ekipi mund të luajë në disa raste me 3 lojtarë të rolit 6 në linja, ndërsa në raste të tjera me skemën 4-4-2. Gjëja kryesore në fund, sipas tij, ishte mbyllja e krahëve dhe bllokimi i dy anësorëve, si majtas ashtu edhe djathtas.
Trajneri vlerësoi punën e bërë me këtë sistem dhe paraqitjen e lojtarëve, por tha se askush nuk mund të jetë gjithmonë perfekt. Ai përmendi mundësinë e një momenti shpërqendrimi, si në rastin e Nikajt, dhe pranoi se tranzicioni negativ nuk funksionoi aq mirë. Laszlo përgëzoi sërish Elbasanin për ndeshjen, të cilën e quajti interesante për çdo teleshikues, duke shtuar se Vllaznia mund të ketë pasur fat.
I pyetur se sa larg mund të shkojë Vllaznia, Laszlo tha se skuadra duhet të qëndrojë me këmbë në tokë. Arritja në gjashtëshen e parë do të ishte një rezultat i mirë, ndërsa ai vetë nuk dëshiron të ëndërrojë me sy hapur.
