Tërmet me magnitudë 5.7 në Japoni/ Mbi 20 persona të plagosur, ndërpriten shërbimet hekurudhore

Sipas Agjencisë Meteorologjike të Japonisë, lëkundjet sizmike u regjistruan në orën 01:04 me kohën lokale, në një thellësi prej 40 kilometrash. Epiqendra ishte në perëndim të prefekturës Shizuoka, rreth 200 kilometra në perëndim të Tokios.

Sipas raportimeve të gazetës lokale “Chunichi Shimbun” dhe televizionit “Tokai”, 24 persona mbetën të plagosur në prefekturën Shizuoka dhe në atë fqinje të Aichi-t. Një zyrtar i shërbimeve të emergjencës në Aichi bëri të ditur se 16 persona kishin pësuar lëndime të lehta, ndërsa autoritetet në Shizuoka raportuan tre të plagosur, mes tyre edhe një grua 90-vjeçare, e cila ra nga shtrati si pasojë e lëkundjeve.

#Japon 🇯🇵 : Un séisme de magnitude 5,7 a secoué le centre du pays à 1h04.
L’épicentre se situe à 40km de profondeur à Shizuoka. Intensité maximale de 5+ à Aichi.
Aucun tsunami à craindre, environ 20 blessés légers signalés. RT JMA https://t.co/55IwWevZP1

— AsieNews (@AsiaNews_FR) November 8, 2026

Përveç të plagosurve, tërmeti shkaktoi edhe dëme materiale, ku u raportuan dritare të thyera në qytetet e prekura. Lëkundjet sollën gjithashtu ndërprerjen e disa shërbimeve hekurudhore, përfshirë edhe trenin me shpejtësi të lartë Shinkansen.

Japonia është një nga vendet më të ekspozuara ndaj aktivitetit sizmik në botë, pasi ndodhet në zonën e bashkimit të katër pllakave tektonike. Sipas të dhënave, arkipelagu japonez përjeton rreth 18% të tërmeteve vjetore në nivel global.

Megjithëse shumica e lëkundjeve nuk shkaktojnë pasoja të rënda, vendi mbetet i shënuar nga katastrofa e 11 marsit 2011, kur një tërmet me magnitudë 9.0 shkaktoi një cunami shkatërrues. Si pasojë, numri i viktimave dhe personave të zhdukur arriti në rreth 18,500, ndërsa centrali bërthamor i Fukushimës u përball me një katastrofë të rëndë.

Top Channel