Inspektorati i Përgjithshëm i Shqipërisë dhe Zyra e Inspektorit të Përgjithshëm të Kosovës kanë nënshkruar një marrëveshje bashkëpunimi, me synim forcimin e kapaciteteve institucionale dhe thellimin e lidhjeve mes dy vendeve në fushën e inspektimeve.
Dokumenti u firmos nga Dashnor Sula dhe Lyra Osmani Ahmeti. Ai parashikon shkëmbimin e njohurive profesionale dhe praktikave të suksesshme, si dhe harmonizimin e metodave të inspektimit. Marrëveshja krijon gjithashtu një platformë për bashkëpunim dhe shkëmbim të përvojës mes ekspertëve të të dyja palëve.
Të lidhura
None found
Modernizimi dhe digjitalizimi i proceseve inspektuese janë ndër çështjet që marrëveshja vendos në fokus, me qëllim përafrimin me standardet bashkëkohore dhe përmirësimin e transparencës e efikasitetit. Parashikohen edhe trajnime të përbashkëta për zhvillimin profesional të inspektorëve, si dhe projekte e nisma rajonale me interes të ndërsjellë.
Inspektorati i Përgjithshëm e vlerëson këtë marrëveshje si një hap të rëndësishëm për ngritjen e standardeve të kontrollit dhe mbikëqyrjes. Bashkëpunimi synon një sistem më transparent e efikas, që mbështet zhvillimin e qëndrueshëm institucional në të dyja vendet.
