Në Gjirokastër itineraret dhe guidat turistike në zonat malore po tërheqin vizitorët vendas dhe të huaj. Grupe të organizuara për turizmin malor dhe të aventurës  përshkojnë me këmbë shtigjet malorë në zonat e Antigonesë, Lunxhërisë, Libohovës, Dropullit, etj. Pjesë e këtyre udhëtimeve janë edhe ngjitjet alpiniste në relievet e thepisura dhe faqet shkëmbore në Malin e Gjerë, Çajup, Malin e Nemërçkës, Murganës, etj.

“Kohët e fundit është rritur ndjeshëm kërkesa, si nga turistët vendas, ashtu edhe nga ata të huaj, për të bërë hiking në këto male dhe për të eksploruar vendet e bukura që kemi në jug të vendit”, tha alpinisti dhe organizitari i tureve malorë, Vasil Çekani.

Krahas të pasionuarve në zonën e Gjirokastrës pjesë e këtyre udhëtimeve janë edhe vizitorë nga qytete të tjera të vendit si edhe turistë të huaj. Pjesëmarrësit në turet malorë, kryesisht të rinj, shijojnë peizazhet natyrore, vlerat e trashëgimisë kulturore në zonat që përshkojmë ndërsa ecja me këmbë dhe sporti i alpinizmit i ndihmon për një trup të shëndetshëm, shprehet organizatori Vasil Çekani.

“Pas çdo ngjitjeje që bëjmë, kthehemi në bujtinat e zonës, ku shijojmë ushqimin dhe produktet vendase, si dhe njihemi me traditat e secilës zonë”, tha ai.

Nëpërmjet këtyre itinerareve  synohet  promovimi i vlerave te pasura natyrore, trashëgiminë kulturore dhe ekoturizmin në zonën e Gjirokastrës.

Gazetare: Enkeleda Domeri

/rtsh.al/