Nga Azgan Haklaj
Fehmi dhe Xhevë Lladrovci: Shtylla e Qendresës dhe Vizioni i Lirisë – Në Pasqyrën e Epikës së Azem Bejtës dhe Shote Galicës!
1- Jeta dhe Vepra:
Rruga e përkushtimit deri në Altarin e Lirisë!
Në themelet e ndërtimit të lirisë sonë kombëtare qëndrojnë figura monumentale, jeta e të cilave shndërrohet në një kod të pashlyeshëm atdhedashurie.
Fehmi Lladrovci dhe Xhevë Krasniqi-Lladrovci janë ndër simbolet më të larta të bashkimit mes mendjes intelektuale, qëndresës politike dhe heroit luftarak.
Fehmi Lladrovci:
Veprimtar i hershëm i Lëvizjes Popullore të Kosovës (LPK), i cili që nga viti 1985 u angazhua në strukturat ushtarake të lëvizjes. Për bindjet dhe veprimtarinë e tij patriotike, ai u arrestua dhe u dënua me dhjetë vite burgim nga regjimi jugosllav.
Pas lirimit, ai vazhdoi veprimtarinë e tij në mërgim, mori pjesë aktive në luftën në Kroaci, u angazhua në organizimin e njësive të para të UÇK-së, u kthye në Kosovë në vitin 1997 dhe u emërua komandant i Brigadës 114-të të UÇK-së në Drenicë.
Xhevë Krasniqi-Lladrovci:
Intelektuale e shquar që kreu studimet për Gjuhë dhe Letërsi Shqipe në Universitetin e Prishtinës, si dhe drejtësi. Ajo ishte veprimtare e Lëvizjes Kombëtare për çlirimin e Kosovës, e përndjekur vazhdimisht nga regjimi jugosllav.
U kthye në Kosovë dhe iu bashkua radhëve të UÇK-së në vitin 1998, duke luftuar krah për krah me bashkëshortin e saj, komandantin Fehmi Lladrovci.
Rënia Heroike!
Më 22 shtator 1998- të, në Çiçavicë, pas një qëndrese epike e të ashpër kundër forcave serbe, Fehmiu dhe Xheva ranë dëshmorë, duke u bashkuar në përjetësi.
Bashkë me ta ra dhe studentja Fatime Hetemi.
Xheva mbetet një ndër figurat më emblematike të gruas shqiptare në luftën për liri, e cila u nderua edhe me gradën gjeneral-major.
2- Krahasimi Historik dhe Shpirtëror:
Fehmi e Xhevë Lladrovci vs. Azem Bejta dhe Shote Galica!
Në historinë e lavdishme të rezistencës shqiptare, paralelizmi mes çiftit Lladrovci dhe ikonave të lëvizjes kaçake Azem Bejta dhe Shote Galica më vjen natyrshëm, si një vazhdimësi e pashkëputur e të njëjtit ideal kombëtar të Drenicës heroike dhe mbarë trojeve shqiptare.
Dualizmi i Plotë i Rezistencës (Burrë e Grua në Front):
Sikurse Azemi dhe Shote Galica që nuk ndaheshin kurrë nga vatrat e luftës dhe mbronin vatrat e tyre me armë në dorë, edhe Fehmiu dhe Xheva mishëruan idealin e bashkëshortëve luftëtarë. Xhevën, ashtu si Shotën, nuk e ndali as dija, as vështirësitë e kohës:
Ajo zgjodhi pushkën dhe penën përkrah njeriut të zemrës, duke dëshmuar se liria kërkon sakrificën e përbashkët të gjinisë njerëzore pa dallim.
Intelekti dhe Organizimi Ushtarak:
Azem Bejta ishte strategu i shquar popullor i çetave kryengritëse, ndërsa Fehmi Lladrovci solli strukturimin modern ushtarak, duke u organizuar që nga LPK-ja, te lufta në Kroaci, e deri te ngritja dhe komandimi i brigadës 114- të UÇK-së.
Nga ana tjetër, formimi prej gjuhëtarje e juristje i Xhevës u dha zë argumenteve politike të kohës së saj, ngjashëm me misionin edukativ dhe luftarak që Shote Galica mbajti gjallë në dekadat e para të shekullit XX-të.
Flijimi në Altarin e Epikës:
Të dyja palët u shndërruan në legjenda të gjalla përmes rënies së tyre heroike.
Qëndresa e Çiçavicës në vitin 1998- të e Fehmiut, Xhevës dhe trimave të tjerë pasqyron të njëjtin shpirt kryengritës që dikur e karakterizonte luftën e Drenicës dhe rezistencën si rezistenca e Azem e Shote Galicës.
Ata nuk u thyen përballë disproporcionit të forcave, duke u bërë monumente të përjetshme të identitetit tonë shpirtëror.
Fehmi dhe Xhevë Lladrovci mbeten dëshmia se gjaku i derdhur për atdhe nuk shuhet kurrë, por shndërrohet në histori, duke u bërë urë lidhëse mes Eposit të Kreshnikëve, trimërisë së Azemit e Shotës dhe triumfit modern të Ushtrisë Çlirimtare të Kosovës.
Lavdi deshmorëve të kombit!
Respekt e mirënjohje për invalidët e veteranët e luftës!
Liri për çlirimtarët!
