SHBA ka njoftuar një shpërblim deri në 20 milionë dollarë për informacione lidhur me programin bërthamor të Iranit. Programi "Shpërblime për Drejtësi" i Departamentit të Shtetit ofron gjithashtu mundësinë e zhvendosjes në SHBA të personit që jep detaje të tilla. Presidenti Donald Trump pretendoi vitin e kaluar se objektet bërthamore të Iranit ishin "shkatërruar plotësisht dhe tërësisht" pas një fushate bombardimesh nga SHBA-ja dhe Izraeli. Irani këmbëngul se programi i tij bërthamor është paqësor dhe se nuk ka ndërmend të zhvillojë armë bërthamore. Ndërkohë, ushtria amerikane bën të ditur se po krijon një grup pune për të forcuar përpjekjet e Uashingtonit për të kufizuar lëvizjen e armëve dhe materialeve të sanksionuara nga Irani përtej kufijve të tij. Komanda Qendrore e ushtrisë amerikane njoftoi se "Task Force Iron Gate" do të operojë nga Tampa, Florida, dhe do të bashkëpunojë me agjenci të tjera të qeverisë amerikane. Përveç lëvizjes së armëve, ky grup do të përqendrohet edhe te mallrat me përdorim të dyfishtë, si dhe te burimet e paligjshme të të ardhurave. Imazhet satelitore sugjerojnë se pranë bazave të raketave iraniane po zhvillohen punime të mëdha ndërtimi.