VIDEO/ Përplasen dy trena në Giza, 4 të vdekur dhe 88 të plagosur

Të paktën katër persona kanë humbur jetën dhe 88 të tjerë janë plagosur pas përplasjes së dy trenave të pasagjerëve në provincën e Gizës, në Egjipt. Aksidenti i rëndë hekurudhor ndodhi të dielën, më 8 nëntor, në zonën e Al-Ayyat, në jug të Kajros.

Sipas autoriteteve egjiptiane, një tren që udhëtonte nga Giza drejt Fayoumit u përplas me pjesën e pasme të një treni tjetër, i cili po kryente itinerarin nga Kajro drejt Asuanit. Përplasja ndodhi në zonën mes stacioneve Kafr Ammar dhe Al-Raqa, duke shkaktuar daljen nga shinat të disa vagonëve.

Ministria egjiptiane e Shëndetësisë konfirmoi bilancin paraprak prej katër viktimash dhe 88 të plagosurish, të cilët janë transportuar në spitalet e zonës për të marrë ndihmën mjekësore. Për evakuimin e pasagjerëve u angazhuan dhjetëra ambulanca, ndërsa ekipet e emergjencës dhe mjetet e rënda u dërguan në vendngjarje për të larguar vagonët e dëmtuar.

Presidenti egjiptian, Abdel Fattah al-Sisi, ka kërkuar një hetim urgjent për zbardhjen e rrethanave të aksidentit, duke udhëzuar autoritetet që të mbajnë përgjegjës personat që mund të rezultojnë neglizhentë.

Ndërkohë, autoritetet hekurudhore kanë ndërmarrë punimet për pastrimin e linjës dhe rikthimin e qarkullimit të trenave. Përplasja ka shkaktuar ndërprerje të lëvizjes në linjën hekurudhore Kajro–Asuan.

Aksidentet hekurudhore kanë qenë një problem i përsëritur në Egjipt, ku në të kaluarën janë regjistruar disa ngjarje me pasoja të rënda. Hetimet pritet të përcaktojnë shkaqet e përplasjes së fundit.