Partia Socialiste dhe Partia Demokratike pritet të ulen sot përballë njëra-tjetrës në tryezën e Reformës Zgjedhore. Pas disa muajsh bllokimi, sot rimblidhet Komisioni i Posaçëm Parlamentar, i cili duket se do të nisë punën pa dakordësinë e palëve.
Komisioni i posaçëm do të rishikojë formulën e përfaqësimit në Këshillat Bashkiakë, pas ndarjes së re territoriale.
Palët do të duhet të adresojnë edhe rekomandimet e OSBE/ ODIHR dhe Komisionit Evropian për një reformë të thellë zgjedhore që nuk duhet të përfshijë vetëm dy partitë e mëdha PD-PS por edhe partitë e tjera.
Demokratët kanë kërkuar ndryshimin e rendit të ditës, pasi sipas tyre ky rend dite nuk është i dakordësuar, për shkak se komisioni është me bashkëkryetar dhe nuk mund të ketë vendime të njënashme. Bashkëkryetari demokrat i Komisionit, Oerd Bylykbashi i ka dërguar një email bashkëkryetarit socialist Damian Gjiknuri dhe anëtarëve të Komisionit për ndryshimin e rendit të ditës.
Bylykbashi kërkon heqjen nga mbledhja e sotme, të diskutimeve që kanë lidhje me reflektimin në Kodin Zgjedhor të ndryshimeve që ka sjellë harta e re territoriale dhe kërkon që sot në mbledhjen e orës 13.00 të diskutohet problemi ndarjes së shtetit nga partia që është edhe rekomandim i OSBE-ODIHR.
Sipas Bylykbashit kërkesa e socialisteve është praktikisht ndryshim sistemi për zgjedhjen e Këshillave Bashkiak, por shton se edhe me këtë kod zgjedhor mund të zgjidhen këshillat pa kërkuar ndryshime të mëtejshme.
Propozimi i PD është për lista 100% të hapura, edhe në zgjedhjen e këshillave bashkiakë. Ndërsa socialistët ende nuk e kanë një propozim mbi sistemin zgjedhor, por kanë paralajmëruar se nëse nuk gjendet një rrugë e dakordësuar do të vijojnë të vetëm reformën.
Por, komisioni duhet të nxitojë pasi në fund të muajit i përfundon mandati dhe mazhoranca ka paralajmëruar se nuk do të ketë shtyrje.