Momente paniku në një park lojrash, dy 13-vjeçarë bëjnë veprime të rrezikshme, plagosen tre persona (VIDEO)
Momente paniku janë regjistruar në një park argëtimi në shtetin e Xhorxhias në SHBA, ku dy adoleshentë 13-vjeçarë shkaktuan lëvizje të pakontrolluara të një loje rrotulluese, duke bërë që sediljet të përplaseshin me njëra-tjetrën. Si pasojë, mbetën të plagosur tre persona, mes tyre dy fëmijë.
Ngjarja ndodhi të shtunën, më 7 nëntor, gjatë panairit të vjeshtës Columbia County Fall Fair, në qytetin Grovetown. Sipas autoriteteve lokale, dy të miturit, të cilët ndodheshin në sedilje të ndryshme të lojës, nisën të kapeshin me njëri-tjetrin, pavarësisht paralajmërimeve të marra për të mos e bërë këtë gjatë funksionimit të saj. Veprimet e tyre dyshohet se destabilizuan lëvizjen e pajisjes.
Pamjet e filmuara nga një dëshmitar tregojnë momentin kur sediljet e varura përplasen me njëra-tjetrën, ndërsa pasagjerët bërtasin të frikësuar. Një grua u transportua me ambulancë në spital, ndërsa dy fëmijët e tjerë pësuan lëndime të lehta dhe morën ndihmën e parë. Prindërit dhe persona të tjerë ndërhynë për të ndaluar pajisjen.
Zyra e Sherifit të Qarkut Columbia bëri të ditur se dy 13-vjeçarët ishin paralajmëruar më herët për sjelljen e tyre. Autoritetet dyshojnë se ata shkaktuan qëllimisht destabilizimin e lojës. Të dy adoleshentët janë akuzuar për incidentin dhe, pasi iu dorëzuan dokumentet përkatëse, u lanë nën kujdesin e prindërve të tyre.
