Merz kushtëzon buxhetin e ri të BE-së: Të gjitha shtetet anëtare të kontribuojnë me financimin e Ukrainës

Kancelari gjerman, Friedrich Merz, ka lidhur marrëveshjen për buxhetin e ardhshëm shtatëvjeçar të Bashkimit Evropian me sigurimin e mbështetjes së re financiare për Ukrainën, duke kërkuar që të gjitha vendet anëtare të kontribuojnë në përballimin e nevojave ekonomike të Kievit.

Ukraina përballet me një mungesë financimi prej rreth 70 miliardë eurosh për buxhetin e vitit 2027, si pasojë e dëmeve dhe kostove të shkaktuara nga sulmet e vazhdueshme ruse. Bashkimi Evropian ka premtuar të mbulojë rreth dy të tretat e kësaj shume, ose afërsisht 45 miliardë euro, përmes një mekanizmi financiar që ende nuk është përcaktuar.

Në një letër drejtuar presidentit të Këshillit Evropian, António Costa, e siguruar nga Euronews, Merz theksoi se një angazhim i përbashkët financiar nga të gjitha shtetet anëtare është kusht për avancimin e diskutimeve mbi çështjet e tjera të buxhetit evropian.

“Një angazhim kolektiv që të gjithë ne, pa përjashtim, do të kontribuojmë në mënyrë të drejtë në mbylljen e këtij boshllëku është një parakusht thelbësor për zgjidhjen e kësaj çështjeje dhe për diskutimin e çdo çështjeje të mëtejshme, veçanërisht atyre me implikime financiare”, shkroi kancelari gjerman.

Merz kërkoi gjithashtu që negociatat për buxhetin shumëvjeçar të BE-së të garantojnë një zgjidhje të qëndrueshme financiare për Ukrainën edhe pas vitit 2027.

Sipas tij, marrëveshja duhet të sigurojë financim afatgjatë për Kievin nga viti 2028 e në vijim, duke përfshirë edhe detyrimet për pagesën e interesave që janë akumuluar deri më tani.

Qëndrimi i kancelarit gjerman vjen në një kohë kur financimi i Ukrainës dhe ndarja e barrës financiare mes vendeve anëtare mbeten ndër çështjet më të ndjeshme në negociatat brenda Bashkimit Evropian