Ministrat e Jashtëm të vendeve të G7 janë mbledhur në Paris, ku në fokus të diskutimeve janë lufta në Ukrainë, tensionet me Iranin dhe sfidat e sigurisë ndërkombëtare. Në këtë takim, ministrat evropianë po i bëjnë presion Sekretarit të Shtetit amerikan, Marco Rubio, për të garantuar një zgjidhje të drejtë për Ukrainën dhe për të shmangur një përshkallëzim të ri ushtarak me Iranin.
Samiti, që zhvillohet sot dhe nesër, përfaqëson një mundësi për Britaninë, Kanadanë, Francën, Gjermaninë, Italinë, Japoninë dhe SHBA-në për të koordinuar qëndrimet përballë zhvillimeve të fundit gjeopolitike.
Shqetësimi kryesor i vendeve evropiane lidhet me negociatat mes Moskës dhe Kievit, të ndërmjetësuara nga Uashingtoni, të cilat pritet të zhvillohen në Abu Dhabi. Evropa druhet se Ukraina mund të detyrohet të pranojë kushte të pafavorshme për t’i dhënë fund luftës, ndërsa SHBA mund të negociojë garanci të reja sigurie me Rusinë pa përfshirjen e duhur të vendeve evropiane.
Ministri i Jashtëm gjerman, Johannes Wadephul, theksoi se Evropa duhet të jetë pjesë e çdo negociate që përcakton të ardhmen e sigurisë së kontinentit.
“Evropa duhet të ketë një vend në tryezën e negociatave”, deklaroi ai, duke nënvizuar se nuk është e nevojshme të krijohet një arkitekturë e re sigurie për Evropën pa përfshirjen e vetë vendeve evropiane.
Nga ana tjetër, ministri i Jashtëm francez, Jean-Noël Barrot, bëri të ditur se edhe përfaqësues evropianë, përfshirë Francën, do të jenë të pranishëm në bisedimet për Ukrainën.
Presidenti amerikan Donald Trump ka shtuar shqetësimet në Evropë me deklaratat për një marrëveshje të madhe me Rusinë, e cila sipas tij mund të përfshijë jo vetëm Ukrainën, por edhe çështje që prekin të gjithë Evropën.
Në kuadër të takimit në Paris, Kanadaja ka njoftuar sanksione të reja ndaj Rusisë, duke shtuar në listën e saj 38 subjekte dhe 24 individë. Masat synojnë të kufizojnë më tej kapacitetet ushtarake të Moskës.
Ndërkohë, ministri i Jashtëm ukrainas, Andriy Sybiha, pritet të marrë pjesë në diskutimet për Ukrainën, ku në fokus do të jenë forcimi i mbrojtjes ajrore, presioni ndaj Rusisë dhe garantimi i lirisë së lundrimit në Detin e Zi.
Një tjetër çështje e rëndësishme në tryezën e G7 është situata me Iranin. Vendet evropiane kërkojnë shmangien e një konflikti të ri ushtarak dhe rikthimin e qarkullimit normal të anijeve në Ngushticën e Hormuzit, një prej korridoreve më të rëndësishme të transportit të energjisë në botë.
Trump nuk e ka përjashtuar plotësisht mundësinë e sulmeve të reja ndaj Iranit, megjithëse së fundmi është shprehur se rifillimi i armiqësive është “jashtëzakonisht i pamundur”.
Ministri gjerman Wadephul paralajmëroi se një përshkallëzim i ri ushtarak duhet shmangur, ndërsa Marco Rubio deklaroi se deri tani nuk ka pasur përparim në negociatat me Teheranin.
Pas diskutimeve në G7, Sekretari amerikan i Shtetit theksoi rëndësinë e bashkëpunimit me partnerët ndërkombëtarë për përballimin e kërcënimeve ndaj stabilitetit rajonal dhe sfidave humanitare.
Rubio u ndal gjithashtu te inteligjenca artificiale, duke mbrojtur qasjen e administratës Trump, e cila sipas tij duhet t’i japë përparësi inovacionit dhe partneriteteve të sektorit privat, në vend të rritjes së rregulloreve dhe burokracisë.
Samiti i Parisit zhvillohet në një moment delikat për marrëdhëniet transatlantike, ku Evropa kërkon të ruajë rolin e saj në vendimmarrjen për sigurinë e kontinentit dhe të shmangë vendosjen e kushteve për Ukrainën pa pjesëmarrjen e saj në negociata.
