Një ish-mësues 58-vjeçar, Clive Bartram, është dënuar me 7 vite e gjysmë burg në Britaninë e Madhe pasi u shpall fajtor për shfrytëzim seksual të të miturave dhe nxitjen e vajzave për të krijuar e dërguar fotografi intime të vetes. Ai u arrestua në banesën e tij në Croydon, në jug të Londrës, në qershor të vitit të kaluar, pasi hetuesit e lidhën me një llogari në rrjetet sociale përmes së cilës publikoheshin materiale të abuzimit seksual me fëmijë. Në kohën kur nisi hetimi, Bartram punonte në një shkollë të mesme; sipas hetuesve, ai komunikonte drejtpërdrejt me vajzat përmes internetit dhe u ofronte karta dhuratash apo shpërblime të tjera në këmbim të fotografive me përmbajtje të papërshtatshme.
Për të komunikuar me viktimat, ai përdorte gjithashtu fotografi të një personi të cenueshëm që njihte, duke krijuar identitete të rreme në internet, dhe i kishte thënë atij personi se gjithçka duhej të mbetej “sekret”. Arrestimi i tij u filmua nga policia; në pamjet ai shihet i ulur në divanin e tij duke luajtur me telekomandën e televizorit ndërsa efektivët i komunikojnë se po e arrestojnë. Gjatë kontrollit në banesë, policia sekuestroi telefona celularë, kompjuterë portativë dhe pajisje USB.
Hetuesit zbuluan se Bartram kishte në përdorim edhe një telefon tjetër, ekzistencën e të cilit ai fillimisht e kishte mohuar; pajisja u gjet më vonë në kopshtin e një prone fqinje pasi ishte hedhur nga dritarja. Ekzaminimet forenzike të pajisjeve dhe llogarive që lidheshin me të zbuluan materiale të paligjshme me përmbajtje seksuale që përfshinin fëmijë, të klasifikuara në të tria kategoritë e përcaktuara nga autoritetet britanike: A, B dhe C. Hetimi identifikoi pesë viktima, të moshës nga 14 deri në 16 vjeç, dhe autoritetet morën masa për mbrojtjen e tyre.
Bartram u shpall fajtor për 13 vepra penale që lidhen me shfrytëzimin seksual të fëmijëve dhe posedimin apo krijimin e materialeve të paligjshme, dhe gjykata e dënoi me shtatë vite e gjysmë burg.