Rezultatet e dobëta çojnë në largimin e Emiljano Celës nga KF Pogradeci, klubi kërkon trajnerin e ri

Emiljano Cela nuk do të jetë më trajner i KF Pogradecit. Klubi liqenor njoftoi zyrtarisht ndërprerjen e bashkëpunimit me teknikun, pas dorëheqjes së këtij të fundit, e cila është pranuar nga drejtuesit

Mësohet nga burime brenda klubit se shkak për largimin e Celës kanë qenë rezultatet e dobëta të skuadrës, të cilat nuk kanë përmbushur objektivat e vendosura për këtë sezon.

Ndërkohë, ende nuk ka një emër zyrtar se kush do të marrë drejtimin e pankinës pogradecare. Drejtuesit e klubit po punojnë për gjetjen e trajnerit të ri, ndërsa deri në përfundimin e këtij procesi, stërvitjet dhe përgatitjet e ekipit do të vijojnë normalisht.

KF Pogradeci pritet të bëjë të ditur emrin e trajnerit të ri përmes një njoftimi zyrtar.