Kryeministri Edi Rama bëri të ditur sot se me buxhetin e vitit 2027-të për mbrojtjen vijon modernizimi i Forcave të Armatosura, si dhe forcohet siguria kombëtare dhe përmbushen angazhimet në kuadër të NATO-s dhe aleatëve strategjik.
Kryeministri Edi Rama ndau sot momente nga një ditë e studentëve të vitit të parë Bachelor dhe kursantëve të Kursit të Përgatitjes së Oficerit, në Qendrën e Arsimimit Profesional të Ushtarëve në Bunavi, Vlorë.
“Një përditshmëri me disiplinë, stërvitje, përkushtim dhe përgjegjësi, ku çdo ditë është një hap më shumë drejt formimit të ushtarakëve të ardhshëm të Forcave të Armatosura”, u shpreh Rama.
Për të rinjtë që kanë zgjedhur Kursin e Përgatitjes së Oficerit, në Qendrën e Arsimimit Profesional të Ushtarëve në Bunavi, Vlorë, të kalosh nga jeta civile në jetën ushtarake nuk është thjesht të veshësh një uniformë, është të ndryshosh mënyrën e mendimit dhe se si e përballon jetën.
“Kalimi nga jeta civile në atë ushtarake është një ndjesi e papërshkruar e cila të nxjerrë nga zona e rehatisë dhe të bën të jesh më e përgjegjshme, më e disiplinuar dhe më e fortë”, u shpreh një kursante.
“Dihet që tranzicioni nga jeta civile në atë ushtarake është një proces i cili prek cilindo jo vetëm në aspektin profesional, por dhe atë personal. Për mua personalisht është një zgjedhje e vetëdijshme e cila më ka bërë më të vendosur që të vë në dispozicion integritetin personal, kompetencat dhe gjithë dijen time në shërbim të Forcave të Armatosura, sigurisë kombëtare dhe integritetit kombëtar”, u shpreh një tjetër.
Për të rinjtë që zgjedhin këtë profesion marrja e iniciativës për të ndjekur kursin e përgatitjes së oficerit është një ndjesi krenarie dhe përgjegjësie.
“Kalimi nga jeta civile në atë ushtarake në Kursin e Përgatitjes së Oficerit ka qenë një sfidë e re për mua. Kam mësuar pjesën e rregullit, të disiplinës, kam mësuar punën në grup dhe për këtë gjë jam shumë e lumtur që mu dha mundësia që të vij këtu dhe të shërbej për atdheun tim”, u shpreh një tjetër kursant.