Vincent Kompany po sheh dritë në fund të tunelit. Trajneri i Bayern Munich është pranë rikthimit në aktivitet, pasi kaloi një periudhë të vështirë shëndetësore për shkak të meningjitit. Tekniku belg, i cili pësoi një gjendje të papritur të fikëti gjatë stërvitjes më 23 tetor dhe përfundoi në spital, po përmbyll fazën e rikuperimit.
Pas një jave të kaluar në spital, Kompany është kthyer në banesën e tij në jug të Mynihut, ku po ndjek një periudhë pushimi të plotë dhe një trajtim të përditshëm mjekësor. Këshilla e mjekëve ka qenë e qartë: sa më pak kontakt me futbollin, më shumë gjumë dhe shmangie e çdo mbingarkese fizike e mendore.
Drejtori sportiv i bavarezëve, Max Eberl, ka dhënë sinjale pozitive për gjendjen e trajnerit, duke theksuar se rikuperimi po ecën sipas planit dhe pa asnjë vonesë. Edhe Uli Hoeness është shprehur optimist, duke konfirmuar se Kompany pritet të rikthehet pas ndeshjeve të kombëtareve.
Gjatë mungesës së belgut, Bayern është drejtuar nga ndihmësi Aaron Danks, duke regjistruar katër fitore dhe një barazim në pesë takime. Kompany ka mbajtur kontakte të vazhdueshme me stafin dhe lojtarët.
Sipas parashikimeve, ai mund të rikthehet në qendrën stërvitore javën e ardhshme, me objektiv ndeshjen ndaj Kolnit më 20 nëntor. Pesë ditë më vonë, bavarezët luajnë në transfertë ndaj Lilës në Champions League.