Kombëtarja e Kosovës do ta ketë një arsye më shumë për optimizëm në dy ndeshjet e fundit të grupit në Ligën e Kombeve, pasi kapiteni Vedat Muriqi po vjen në grumbullim në një formë shumë të mirë.
Për Kosovën, rikthimi i tij në këtë gjendje është tejet i rëndësishëm. “Dardanët” kanë përpara dy përballje ku duhet të kërkojnë rezultatet e nevojshme për ta arritur objektivin në grup, ndërsa prania e një sulmuesi me përvojën dhe efikasitetin e Muriqit mund të jetë vendimtare.
Mungoi ndaj Izraelit për shkak të problemeve muskulore
Në ndeshjen e 1 tetorit ndaj Izraelit, e cila përfundoi pa gola, Kosova nuk mundi të llogariste në shërbimet e kapitenit të saj.
Muriqi nuk ishte në gjendje të paraqitej për shkak të një shqetësimi muskulor që kishte ndier gjatë përgatitjeve. Mungesa e tij nxiti edhe spekulime në rrjetet sociale, por kapiteni doli vetë për ta sqaruar situatën dhe për të mohuar pretendimet se kishte refuzuar të luante për Kosovën.
Ai shpjegonte se kishte pasur ngarkesë në muskuj dhe se më parë kishte kaluar edhe një lëndim që kishte ndikuar në gjendjen e tij fizike.
“Kisha ngarkesë të muskujve, është normale. Kisha lëndim para një muaj e gjysmë. Sot do të stërvitem dhe do të jem gati për lojë”, kishte deklaruar Muriqi, duke konfirmuar se synonte të ishte në dispozicion për sfidën pasuese ndaj Austrisë.
Ai u paraqit në atë ndeshje, por nuk arriti të kompletojë 90 minutat e plota.
Statistikat te Fenerbahce dëshmojnë rikthimin e tij të fuqishëm
Forma e Muriqit në Turqi është një sinjal i rëndësishëm për Kosovën. Në 11 paraqitje në Superligën turke ai ka realizuar shtatë gola dhe ka dhuruar një asistim.
Një prej paraqitjeve të tij më të mira ishte në fitoren 8-0 ndaj Eyupsorit, ku realizoi katër gola brenda 69 minutave sa qëndroi në fushë. Ai regjistroi gjashtë goditje drejt portës në atë takim, katër prej të cilave përfunduan në kuadrat.
Përveç kampionatit, Muriqi ka lënë gjurmë edhe në Ligën e Kampionëve. Në ndeshjen kundër Liverpoolit, ai u aktivizua nga banka rezervë dhe në minutën e 79-të shënoi golin e fitores për Fenerbahçen, që triumfoi me rezultat 3-2.
Kapiteni që i jep Kosovës më shumë se sa vetëm gola
Rëndësia e Muriqit për ekipin kombëtar nuk kufizohet vetëm te statistikat e tij. Ai është një prej futbollistëve me më së shumti përvojë në këtë grup dhe një pikë referimi për repartin ofensiv të Kosovës.
Në ndeshjen hapëse ndaj Irlandës, Muriqi realizoi golin e vetëm të takimit, duke i siguruar Kosovës tri pikë të rëndësishme në fitoren 1-0.
Përveç aftësisë për të shënuar, sulmuesi i ofron ekipit mundësi të tjera në lojë. Me fizikun dhe forcën në duele, ai mund të mbajë topin, të fitojë hapësira dhe të krijojë mundësi për futbollistët që vijnë nga prapavija apo krahët.
Si kapiten, Muriqi ka edhe përgjegjësinë për ta udhëhequr skuadrën në momentet më të vështira. Ai vetë ka theksuar se dëshiron që përvoja e tij, së bashku me atë të futbollistëve të tjerë me përvojë, t'u shërbejë lojtarëve të rinj të Kosovës.
Për këtë arsye, rikthimi i tij në formë të mirë është një lajm i rëndësishëm për Franco Fodën.
Dy ndeshje vendimtare për Kosovën
Kosova do t'i zhvillojë gjatë nëntorit dy ndeshjet e fundit të grupit B3 në Ligën e Kombeve. Fillimisht, më 14 nëntor, “Dardanët” do ta presin Izraelin në stadiumin “Fadil Vokrri”, ndërsa më 17 nëntor do të përballen me Irlandën në udhëtim.
Pas katër ndeshjeve, Kosova ka pesë pikë, aq sa Irlanda, ndërsa Austria kryeson grupin me tetë pikë. Izraeli ka dy pikë.
Kosova ka nevojë për kapitenin e saj më shumë se kurrë ndërsa forma e treguar në Turqi jep shpresë se ai mund të jetë një prej figurave kryesore në dy sfidat që e presin Kombëtaren./Telegrafi/
