Mesfushori shqiptar i Sunderlandit dhe kapiteni i Përfaqësueses së Zvicrës, Granit Xhaka, ka marrë një vlerësim të veçantë nga prestigjiozja britanike “The Guardian”.
Gazeta e njohur e ka renditur Xhakën si futbollistin më të mirë që ka mbajtur fanellën me numrin 34, në një përzgjedhje të lojtarëve më të spikatur në historinë e futbollit sipas numrave të fanellave.
Në këtë renditje, mesfushori me prejardhje shqiptare ka lënë pas edhe emra të njohur, mes tyre ish-futbollistin holandez Nigel de Jong.
Për Xhakën, numri 34 nuk është thjesht një numër në fanellë, por mbart një histori personale që nga hapat e parë të karrierës së tij.
Gjithçka nisi në periudhën kur ai stërvitej në akademinë e Baselit. Autobusi që përdorte për të shkuar në stërvitje mbante numrin 34, të cilin futbollisti vendosi ta kthente në simbol të karrierës së tij.
Që atëherë, Xhaka i ka qëndruar besnik këtij numri gjatë aventurave të tij te Baseli, Borussia Mönchengladbach, Arsenali dhe Bayer Leverkuseni.
Pas transferimit nga Leverkuseni te Sunderlandi për rreth 15 milionë euro, mesfushori është shndërruar në një nga figurat kryesore të skuadrës angleze.
Aktualisht, Xhaka po përballet me një dëmtim, por rëndësia e tij mbetet e madhe si për Sunderlandin, ashtu edhe për Përfaqësuesen e Zvicrës.