Kryetarja e Kuvendit të Kosovës takon drejtorin e lartë të IRI-së, temë edhe bashkëpunimi parlamentar

Kryetarja e Kuvendit të Kosovës, Albulena Haxhiu, ka pritur në takim Stephen B. Nix, drejtor i lartë për Evropë dhe Euroazi në Institutin Republikan Ndërkombëtar (IRI).

Haxhiu ka bërë të ditur se gjatë takimit kanë diskutuar për zhvillimet në Kosovë, punën e Kuvendit dhe mundësitë për forcimin e bashkëpunimit parlamentar.

Temë e diskutimit kanë qenë edhe prioritetet legjislative, mbikëqyrja parlamentare dhe rëndësia e dialogut e bashkëpunimit ndërmjet grupeve parlamentare.

Po ashtu, sipas Haxhiut, janë shkëmbyer pikëpamje për zhvillimet politike në Ballkanin Perëndimor, sfidat rajonale dhe rëndësinë e stabilitetit e bashkëpunimit ndërmjet vendeve të rajonit.

Në fund, Haxhiu ka falënderuar Nix për takimin dhe ka vlerësuar kontributin e IRI-së ndër vite në zhvillimin e demokracisë në Kosovë, duke shprehur gatishmërinë për vazhdimin e bashkëpunimit, veçanërisht në forcimin e kapaciteteve parlamentare.