Një festim golash, përkatësia e një grup futbollistësh të bashkuar nga besimi te Zoti dhe reagimi i tifozëve kanë shkaktuar polemika në Gjermani. Mesfushori Felix Nmecha festoi dy golat ndaj Elversberg duke vendosur mbi kokë një kurorë, në një gjest të njohur si “Kthimi i Mbretit”.

Kundër tij reaguan edhe tifozët e Borussia Dortmundit, klub ku aktivizohet futbollisti. Nmecha është pjesë e grupimit “Lojtarët në Zot”, themeluar nga ish-futbollisti i Crystal Palace, John Bostock. Sipas një investigimi të televizionit ARD, grupi ka qëndrime homofobike dhe diskriminuese.

“Qëndrime të tilla bien ndesh me vlerat e tolerancës dhe respektit për diversitetin të Borussia Dortmundit”, – deklaroi shoqata e tifozëve. Nga ana tjetër, grupi u pozicionua: “Duam të tregojmë dashuri dhe respekt ndaj të gjithëve”.

Nmecha foli për “keqkuptime”, duke sqaruar: “Nuk kishte asnjë qëllim për të promovuar intolerancën, diskriminimin apo urrejtjen në çfarëdo forme”.