Puna në infermieri kërkon vëmendje dhe përkushtim të vazhdueshëm ndaj pacientëve. Për disa punonjës shëndetësorë, megjithatë, përvojat në spital lënë gjurmë të thella dhe mund të jenë edhe të frikshme.
Një infermiere rrëfeu në TikTok një ngjarje që e përshkroi si ndër më të frikshmet e karrierës së saj. Sipas saj, një paciente e moshuar i foli për një djalë të vogël që pretendonte se ishte ulur në një karrige bosh të dhomës.
Të lidhura
None found
Rasti, siç tregohet në rrëfim, ndodhi gjatë një turni nate në një spital në Luiziana të SHBA-së. Pacientja, rreth të 80-ave dhe plotësisht e vetëdijshme, e thirri infermieren afërsisht në orën 02:30 dhe i kërkoi ta kthente karrigen, e cila ishte përballë murit, shkruan Daily Star, transmeton Klankosova.tv.
“Djali i vogël që është ulur në të po më buzëqesh. Nuk më pëlqejnë sa shumë dhëmbë ka”, i tha pacientja, sipas infermieres.
Infermierja mendoi se pacientja mund të kishte halucinacione dhe e ktheu karrigen nga muri. Pas rreth 20 minutash, e moshuara e thirri përsëri, këtë herë duke qarë.
“Nuk është dashur t’ia kthesh karrigen”, i tha ajo. Kur infermierja kërkoi të dinte arsyen, pacientja iu përgjigj: “Sepse tani ai po qëndron pas teje”.
Rrëfimi vijon se në orën 03:17 pacientja pësoi arrest kardiak. Stafi u përpoq ta ndihmonte, por ajo ndërroi jetë.
Infermierja tha se më pas, teksa po përgatitej dhoma, gjeti një shënim të palosur nën jastëkun e pacientes. Në të shkruhej: “Ai nuk është djalë i vogël. Thjesht përkulet që ti t’ia shohësh fytyrën”.
Ajo e lidhi ngjarjen me vdekjen e një vajze shtatëvjeçare, e cila kishte ndërruar jetë në të njëjtën dhomë tre muaj më herët. Sipas rrëfimit, para vdekjes vajza kishte bërtitur se po shihte një burrë në cep të dhomës.
Infermierja pretendoi se këto përvoja e shtynë të vendoste të largohej nga puna. Ajo tregoi se edhe ditën e fundit, teksa po dilte, një roje sigurie e ndaloi dhe e pyeti: “Pse ai djaloshi i vogël të ndjek gjithmonë nëpër korridor?”
Historia e publikuar në TikTok u përhap gjerësisht dhe ngjalli reagime të shumta në rrjetet sociale. Megjithatë, vërtetësia e saj nuk është konfirmuar në mënyrë të pavarur.
