165 ditë revoltë, qytetarë e studentë mblidhen sot para Ministrisë së Arsimit

Protesta kundër qeverisë së Edi Ramës hyn sot në ditën e saj të 165-të, ndërsa lëvizja qytetare dhe studentore pritet të zhvendosë sërish vëmendjen në rrugët e kryeqytetit. Për këtë të mërkurë është paralajmëruar një protestë kombëtare, e cila do të nisë në orën 14:00 përpara Ministrisë së Arsimit.

Në tubim pritet të bashkohen studentë, qytetarë të Tiranës dhe pjesëmarrës nga qytete të ndryshme të Shqipërisë, me synimin për të zgjeruar reagimin kundër qeverisë dhe për të kërkuar largimin e kryeministrit Edi Rama.

Ministria e Arsimit është përcaktuar si pika e nisjes së protestës. Pas grumbullimit, pjesëmarrësit planifikojnë të marshojnë në drejtim të Kryeministrisë, ku pritet të vijojë tubimi dhe të përcillen mesazhet e tyre kundërshtuese ndaj qeverisë.

Organizatorët u kanë bërë thirrje qytetarëve dhe studentëve që t’i bashkohen protestës, duke synuar një mobilizim sa më të gjerë në nivel kombëtar. Tubimi i sotëm shihet si një tjetër përpjekje për t’i dhënë vazhdimësi revoltës që prej 165 ditësh shpreh pakënaqësinë ndaj qeverisjes së vendit.

Kërkesa për dorëheqjen e Edi Ramës mbetet një nga mesazhet kryesore të kësaj lëvizjeje, e cila kërkon të mbajë të gjallë presionin qytetar ndaj mazhorancës.