Plagosen me armë zjarri dy persona në Gjakovë, arrestohet i afërmi i tyre

Dy persona janë plagosur me armë zjarri në Gjakovë, ndërsa i dyshuari për rastin, i cili ka lidhje familjare me të plagosurit, është arrestuar nga policia.

Sipas raportit të Policisë së Kosovës, ngjarja ka ndodhur ditën e djeshme, rreth orës 16:30.

Të plagosurit janë dërguar për trajtim mjekësor dhe, sipas mjekëve, ndodhen jashtë rrezikut për jetën.

Policia ka bërë të ditur se palët e përfshira në incident kanë lidhje familjare ndërmjet tyre, ndërsa motivi i ngjarjes ende nuk dihet.

Gjatë ndërhyrjes, policia ka arrestuar të dyshuarin dhe ka sekuestruar një armë zjarri, e cila dyshohet se është përdorur në incident, 4 gëzhoja dhe 1 fishek.

Po ashtu, bashkëshortja e të dyshuarit ka dorëzuar në polici një armë gjuetie që ishte në pronësi të tij.

Rasti po hetohet për veprat penale “Vrasje në tentativë” dhe “Armëmbajtje pa leje”.