Raporti i auditimit për Trepçën për vitin 2025 ka evidentuar një sërë parregullsish financiare, përfshirë mungesën e dokumentacionit për pasuri me vlerë mbi 42 milionë euro, pasiguri në vlerësimin e stoqeve prej më shumë se 23 milionë eurosh dhe mbivlerësim të llogarive të arkëtueshme. Këto çështje u diskutuan në Komisionin për Mbikëqyrjen e Financave Publike, ku u ngritën dyshime për saktësinë e pasqyrave financiare dhe përgjegjësinë e menaxhmentit.
Gjatë shqyrtimit të dokumentit, kryetari i komisionit, Besian Mustafa, deklaroi se numri i madh i gjetjeve përbën shqetësim serioz për mënyrën se si është raportuar gjendja financiare e ndërmarrjes.
Të lidhura
None found
Mustafa tha se pasqyrat financiare nuk paraqesin në mënyrë të saktë realitetin e Trepçës. Sipas tij, ndërmarrja nuk ka përmbushur plotësisht kërkesat për dy inventarë që lidhen me matjen dhe paraqitjen e stoqeve. Për një pjesë të konsiderueshme të stoqeve, në vlerë prej 23 milionë e 187 mijë eurosh, nuk janë paraqitur dëshmi të mjaftueshme për metodologjinë e përdorur në përcaktimin e vlerës, duke krijuar pasiguri mbi saktësinë e tyre.
Ai shtoi se Trepça nuk e kishte paraqitur siç duhet detyrimin e klientit në kategorinë e llogarive të arkëtueshme, çka ka sjellë mbivlerësim të tyre me 376 mijë e 245 euro. Po ashtu, sipas kryetarit të komisionit, ndërmarrja nuk ka garantuar regjistrim të plotë e të saktë të pasurive afatgjata dhe nuk ka siguruar dokumentacion për pasuri me vlerë 42 milionë e 755 mijë e 994 euro. Për pasojë, ekziston rreziku që pasuritë dhe rezultatet financiare të jenë materialisht të shtrembëruara dhe të mos japin një pamje të drejtë të gjendjes së ndërmarrjes.
Kryetari i Bordit të Trepçës, Shpëtim Dobra, bëri të ditur se për adresimin e mangësive janë ndërmarrë disa hapa, por pranoi se një numër i madh çështjesh ende nuk janë përmbyllur.
Sipas Dobrës, pesë rekomandime janë zbatuar tërësisht, katër janë realizuar pjesërisht, ndërsa 27 rekomandime të tjera ndodhen ende në proces zbatimi. Menaxhmenti ka vendosur që afati për përfundimin e tyre të jetë fundi i vitit 2026.
Dobra tha se ndër masat e ndërmarra janë krijimi i komisioneve, hartimi i procedurave të brendshme dhe përmirësimi i evidencave. Megjithatë, ai nënvizoi se disa nga çështjet vazhdojnë të mbeten të hapura dhe kërkojnë angazhim më të madh, si dhe përshpejtim të punës.
Kryeshefi ekzekutiv i Trepçës, Faton Ahmeti, e lidhi një pjesë të gjetjeve me konsolidimin e pasqyrave financiare, proces që, sipas tij, është kryer për herë të parë gjatë vitit 2024.
Ahmeti sqaroi se ky proces nxori në pah probleme që më herët nuk ishin evidentuar në të njëjtën mënyrë. Pasqyrat financiare përfshijnë njësitë e ndërmarrjes në jug dhe veri të Mitrovicës, ndërsa katër nga gjetjet lidhen me njësinë në Leposaviq.
Sipas kryeshefit ekzekutiv, në total janë evidentuar 10 gjetje, prej të cilave gjashtë janë të reja. Ai tha se në pasqyrat financiare janë bërë shpalosjet përkatëse dhe njësitë janë ndarë si Mitrovica Jug dhe Mitrovica Veri. Ahmeti theksoi se, krahasuar me vitin 2024, performanca është më e mirë dhe të hyrat janë rritur.
Këto deklarime shkaktuan reagimin e deputetit Eman Rrahmani, i cili kundërshtoi mënyrën e paraqitjes së gjetjeve të auditimit.
Rrahmani kërkoi që në komision të paraqitej gjendja e plotë e ndërmarrjes dhe ngriti pikëpyetje për përgjegjësinë e menaxhmentit dhe mbikëqyrjen e njësisë në veri.
Ai pyeti nëse drejtuesit e Trepçës kanë kontroll dhe mundësi mbikëqyrjeje mbi njësinë në veri, duke theksuar se mosparaqitja e plotë e gjendjes përbën problem për punën e komisionit.
Në përgjigje, Ahmeti tha se nuk po i mohonte gjetjet e auditimit, por se ato duhet të ndahen sipas njësive përkatëse për shkak të mënyrës se si janë konsoliduar pasqyrat financiare.
Ai sqaroi se të 10 gjetjet janë pjesë e raportit, por ndarja e tyre është e domosdoshme për të përcaktuar se me cilën pasqyrë financiare lidhet secila prej tyre.
Të mërkurën, para këtij komisioni ka raportuar edhe kryeshefi ekzekutiv i Kompanisë Regjionale të K.R.U. “Hidrodrini”.
Pas raportimit për Trepçën, pritet të paraqiten para komisionit edhe kryeshefi ekzekutiv dhe kryesuesi i bordit të Komisionit të Pavarur për Miniera dhe Minerale për vitin 2025.
