Autoritetet identifikuan dhe arrestuan në Greqi një shtetas me rrezikshmëri të lartë shoqërore, i cili përdorte identitet të rremë. Identifikimi u bazua në ekspertimin e të dhënave biometrike të kryer nga specialistët e Institutit të Policisë Shkencore. Arrestimi u realizua si rezultat i koordinimit informativ dhe operacional ndërmjet specialistëve të Drejtorisë së Interpolit dhe homologëve të Interpol Athinës.
I kërkuari ndërkombëtarisht është Zef Preldakaj alias Fran Preldakaj, 44 vjeç, i cili në Greqi përdorte emrin Nikolin Pali dhe kishte ndryshuar datëlindjen. Në Shqipëri, Gjykata e Shkodrës e ka dënuar në vitin 2008 me 22 vjet burgim për veprën penale “Vrasja në rrethana të tjera cilësuese, kundër dy ose më shumë personave”, kryer në bashkëpunim. Ngjarja për të cilën u dënua ka ndodhur në vitin 2002, kur ai së bashku me shtetasit A. N. dhe B. D. shkuan në subjektin e vëllezërve S. V. në fshatin Shtoj i Vjetër, me qëllim grabitjen e xhiros ditore. Gjatë tentativës, A. N. ka qëlluar me armë duke shkaktuar vdekjen e dy vëllezërve, ndërsa hetimet provojnë se Preldakaj ka qëndruar në derë për të mbuluar dhe siguruar veprimet e bashkëpunëtorëve dhe më pas është larguar së bashku me ta.
Autoritetet greke e akuzuan në vitin 2020 në Korinth për vrasjen e një shtetasi grek dhe një shtetaseje ukrainase, trupat e të cilëve u gjetën në një automjet. Përveç këtyre akuzave, ai rezulton me precedentë penalë në Greqi: për grabitje me armë dhe shkelje të ligjit për armët në vitin 2014; shkelje të ligjit për rregullimin e tregut të lojërave të fatit në vitin 2013; dhe posedim të lëndëve narkotike në vitin 2005.
Interpol Tirana po bashkëpunon me autoritetet greke për dokumentimin e plotë të përfshirjes së tij në aktivitet kriminal dhe për përgatitjen e dokumentacionit të nevojshëm për ekstradimin e tij në Shqipëri.