Shoferët e taksive kanë dalë në protestë këtë të mërkurë, duke ngritur shqetësimin për vështirësitë ekonomike dhe problemet me të cilat përballen gjatë ushtrimit të aktivitetit të tyre.

Sindikata e Transportit Taksi të Shqipërisë dhe ajo e Transportit Taksi për Rrethin e Tiranës kanë paralajmëruar se do të ndërmarrin hapa të mëtejshëm sindikalë në rast se institucionet përgjegjëse nuk reagojnë ndaj kërkesave të paraqitura.

Sipas përfaqësuesve të sindikatave, sektori po përballet me një sërë problematikash që kanë ndikuar drejtpërdrejt në uljen e të ardhurave të drejtuesve të taksive. Mes shqetësimeve kryesore renditen rritja e numrit të automjeteve të licencuara pa një kontroll të përshtatshëm, konkurrenca nga mjetet që ushtrojnë aktivitet pa licencë, kostot e larta të karburantit, detyrimet tatimore dhe tarifat e parkimit.

Përfaqësuesit e taksistëve deklarojnë se kanë tentuar t’i adresojnë këto probleme përmes komunikimit institucional, duke zhvilluar një takim me përfaqësues të Bashkëqeverisjes, ministrisë përgjegjëse për transportin dhe infrastrukturën, Bashkisë së Tiranës, Policisë Rrugore, Policisë së Rendit dhe Policisë Bashkiake.

Megjithatë, sindikatat shprehen të pakënaqura me mënyrën se si janë trajtuar shqetësimet e tyre, duke kritikuar veçanërisht Bashkinë e Tiranës për atë që e cilësojnë mungesë angazhimi në gjetjen e zgjidhjeve konkrete.

Në listën e kërkesave të paraqitura nga sindikatat përfshihet zbatimi rigoroz i tarifave të taksimetrit, si dhe vendosja e kritereve të qarta për personat që ofrojnë shërbimin taksi.

Një tjetër kërkesë lidhet me pronësinë e targave, licencave dhe pullave të lëshuara nga Bashkia, të cilat, sipas sindikatave, duhet t’i përkasin drejtpërdrejt individit që ushtron aktivitetin.

Taksistët kërkojnë gjithashtu largimin nga tregu të automjeteve që ofrojnë shërbime transporti pa autorizimin përkatës, duke argumentuar se kjo praktikë krijon konkurrencë të pandershme.

Sa i përket kostove të operimit, ata kërkojnë uljen dhe stabilizimin e çmimit të karburantit në raport me tregjet ndërkombëtare, si dhe kontrolle për garantimin e cilësisë së tij.

Në të njëjtën kohë, sindikatat kërkojnë që shërbimi taksi të trajtohet me më shumë përparësi nga autoritetet përgjegjëse për qarkullimin rrugor.

Ndër propozimet e tyre është edhe përcaktimi i një kufiri për numrin e licencave të taksive, duke marrë si kriter numrin e banorëve, si dhe subvencionimi i karburantit për këtë kategori transporti.

Përfaqësuesit sindikalë argumentojnë se shërbimi taksi është pjesë e transportit publik dhe, për këtë arsye, duhet të përfitojë politika mbështetëse nga institucionet shtetërore.

Në mungesë të një reagimi konkret ndaj këtyre kërkesave, sindikatat paralajmërojnë vijimin dhe përshkallëzimin e protestave, ndërsa mbetet për t’u parë nëse do të ketë një marrëveshje mes palëve për zgjidhjen e problematikave të ngritura.