Kylie Jenner është përballur sërish me probleme ligjore, pasi një tjetër ish-punonjëse e saj ka ngritur padi ndaj saj, duke e akuzuar për keqtrajtim kushte të vështira pune dhe disa incidente që pretendohet se i kanë shkaktuar lëndime fizike dhe shqetësime emocionale.

Sipas dokumenteve gjyqësore, ish-punonjësja Dinora Carolina Camria Amaya pretendon se gjatë periudhës së punës në rezidencën e Jenner në Los Angeles është përballur me një sërë situatash problematike.

Një nga akuzat më të rënda lidhet me një incident, gjatë të cilit ajo pretendon se është mbyllur brenda një dollapi për më shumë se një orë. Sipas saj, ndërsa kërkonte ndihmë dhe po përjetonte një atak paniku, mbikëqyrësi i saj është tallur me të dhe nuk ka ndërhyrë për ta ndihmuar.

Në padi përmenden edhe dy incidente të tjera. Amaya pretendon se në tetor të vitit 2025 është kafshuar nga një qen, ndërsa po pastronte banesën, si dhe është dëmtuar në fytyrë pasi një pajisje me sprej piperi u aktivizua aksidentalisht brenda një sirtari.

Ajo pretendon gjithashtu se, pavarësisht lëndimeve, i është kërkuar të vazhdonte punën fizike. Krahas kësaj, ish-punonjësja ngre pretendime për mospagesë të orëve shtesë dhe të kohës së udhëtimit ndërmjet rezidencave të Kylie Jenner.

Sipas saj, situata përfundoi në shkurt të vitit 2026, kur u pushua nga puna pasi ngriti shqetësime për rimbursimin e shpenzimeve të udhëtimit.

Nga ana tjetër, Kylie Jenner i ka mohuar akuzat përmes avokatit të saj, Michael Rhodes, i cili i ka cilësuar ato si të pabaza. Ai pretendoi se padia është pjesë e një serie çështjesh të ngritura nga i njëjti avokat në emër të ish-punonjësve të familjes Jenner.

Avokati deklaroi se Jenner dhe ekipi i saj do t'i kundërshtojnë me vendosmëri pretendimet dhe se presin të paraqesin në gjykatë versionin e tyre të ngjarjeve.

“Është e qartë se ky avokat po përpiqet të shfrytëzojë publicitetin për të përfituar financiarisht në mënyrë të padrejtë”, deklaroi Rhodes, duke shtuar se Jenner dhe ekipi i saj nuk do të tërhiqen përballë këtyre pretendimeve.

“Ne do t’i kundërshtojmë me vendosmëri këto akuza të pabaza dhe presim me padurim të paraqesim versionin tonë të ngjarjeve”, përfundoi avokati.

Kjo është një tjetër çështje ligjore që lidhet me pretendimet e ish-punonjësve të familjes Jenner, ndërsa akuzat e përmendura në padi mbeten për t'u shqyrtuar nga drejtësia.