FSK reagon pas publikimit të pamjeve ku një ushtar vetëplagoset duke gjuajtur me mitraloz (VIDEO)

Forca e Sigurisë së Kosovës (FSK) ka reaguar pas publikimeve të pamjeve ku shihet një ushtar i FSK-së duke u lënduar gjatë trajnimeve në një poligon.

FSK ka thënë se ushtari është “lënduar lehtë”, teksa kanë konfirmuar që i njëjti ka qenë duke shtënë në njërin prej poligoneve të FSK-së gjatë një trajnimi.

“Sa i përket njoftimeve nga mediat lidhur me lëndimin e lehtë të një pjesëtari të FSK-së, gjatë trajnimit ju informojmë që rasti ka ndodhur më herët në një nga poligonet e FSK-së. Forca e Sigurisë së Kosovës gjatë realizimit të trajnimeve me municione ballafaqohet me rrezikshmëri të lartë dhe merr paraprakisht të gjitha masat e nevojshme parandaluese për menaxhimin e rrezikut, duke përfshirë pajisjet individuale dhe kolektive për mbrojtjen e personelit”, thuhet në komunikatën për media të FSK-së.

Nga FSK kanë bërë të ditur se gjatë trajnimeve kanë qenë të pranishëm edhe ekipet mjekësore, ashtu siç parashihet edhe me standardet e NATO-s.

“Po ashtu, në secilin aktivitet të FSK-së, konform procedurave standarde në fuqi i bashkëngjiten ekipet mjekësore për evakuim mjekësor potencial. Të gjitha masat e sigurisë janë në linjë me standardet e sigurisë të FSK-së, njëjtë sikur ato të NATO-s. FSK është e vetëdijshme që profesioni ushtarak përbën në vete një rrezikshmëri të lartë, në përmbushje të misionit kushtetues dhe ligjor, megjithatë në relacion me nivelin e aktiviteteve, numri i aksidenteve mbetet i vogël për shkak të masave të sigurisë në menaxhimin e rrezikut. Njëkohësisht, FSK mbetet e përkushtuar që vazhdimisht të rrisë sigurinë dhe garantojë ruajtjen e personelit”, kanë thënë FSK.