Kryeministri i Shqipërisë, Edi Rama, ka paralajmëruar se Serbia nuk mund të shkëputet nga e kaluara pa normalizuar marrëdhëniet me Kosovën.
Gjatë një bashkëbisedimi në Dublin të Irlandës, të organizuar nga Instituti i Çështjeve Ndërkombëtare dhe Evropiane (IIEA), Rama ka komentuar zhvillimet e fundit politike në Serbi, duke theksuar se është ende herët për të qenë entuziast për ndryshimet e mundshme në këtë vend.
Ai tha se zhvillimet politike në Serbi dhe ndikimi i tyre në perspektivën evropiane të Ballkanit Perëndimor mbeten të paqarta.
“Është shumë herët për të thënë diçka me saktësi për atë që vjen më pas”, deklaroi Rama, raporton KP.
Duke komentuar zhvillimet e brendshme politike në Serbi, kryeministri shqiptar i cilësoi ato si një eksperiment social dhe politik, duke iu referuar të ashtuquajturës “Listë Studentore” dhe mënyrës së përzgjedhjes së kandidatëve që mund të jenë pjesë e parlamentit apo qeverisë.
Sipas tij, kjo përfaqëson një qasje të re në politikën serbe, por mbetet të shihet nëse do të sjellë ndryshime konkrete në qeverisjen e vendit dhe në raportet e tij me Bashkimin Evropian.
Rama theksoi se Komisioni Evropian ka pasur probleme me administratën e mëparshme serbe, veçanërisht në çështjet që lidhen me sundimin e ligjit dhe përmbushjen e kritereve themelore për anëtarësim në BE.
Megjithatë, ai e vendosi theksin te marrëdhëniet me Kosovën, duke vlerësuar se pa normalizimin e tyre, Serbia do të vazhdojë të përballet me pasojat e së kaluarës.
“Për aq kohë sa nuk ka një qasje të hapur kundrejt Kosovës dhe normalizimit me të, kjo do të thotë që fantazma e së shkuarës do të vazhdojë ta përndjekë Beogradin dhe do të vazhdojë ta pengojë kombin serb që të kryejë një katarsis kaq të nevojshëm, që ende mungon”, u shpreh Rama.
Deklaratat e kryeministrit shqiptar vijnë në kohën kur zhvillimet e brendshme politike në Serbi dhe procesi i dialogut me Kosovën vazhdojnë të jenë ndër çështjet kryesore për stabilitetin rajonal dhe integrimin evropian të Ballkanit Perëndimor.
