Të paktën pesë persona janë qëlluar nga një person i armatosur në Uashington, rreth 15 minuta në këmbë nga Shtëpia e Bardhë, raportoi Associated Press, duke cituar burime policore.

Policia paralajmëroi se po zhvillohej një situatë me të shtëna aktive dhe u kërkoi njerëzve të shmangnin zonën.

“Ekipi i Reagimit ndaj Emergjencave i MPD-së është në vendngjarje. SHMANGNI ZONËN”, tha Departamenti i Policisë së DC-së në X të enjten në mëngjes.

Policia tha se autori i të shtënave është i barrikaduar në një ndërtesë pranë vendit të ngjarjes.

Të paktën një person mund të jetë vrarë në të shtënat, sipas një dëshmitari okular të cituar nga AP.

«Brenda pak sekondash, një burrë ra përtokë dhe doli një pellg gjaku», i tha agjencisë së lajmeve dëshmitari, i cili ndodhej në një palestër kur filluan të shtënat. «Një anëtar i palestrës nxitoi ta ndihmonte. Ai vdiq menjëherë. Ishte qëlluar në qafë».

Videot dhe imazhet që qarkullojnë në mediat sociale pretendojnë se tregojnë policë të armatosur rëndë të vendosur në çatitë përreth një ndërtese. Pamje të tjera tregojnë oficerë të armatosur me mburoja balistike që i afrohen asaj që duket të jetë e njëjta ndërtesë.