Alarm për zhdukjen e gazetarit Elton Tozaj, reagon nëna e tij

Mungesa e komunikimit me gazetarin Elton Tozaj për disa ditë ka ngritur shqetësim te miqtë, të njohurit dhe ndjekësit e tij në rrjetet sociale. Alarmi u shtua veçanërisht pas deklaratave të fundit të gazetarit, i cili kishte paralajmëruar publikimin e informacioneve të reja që lidheshin me personazhe të njohur të showbiz-it shqiptar.

Shqetësimin e bëri publik Ilir Vrenozi, i cili tregoi se kishte humbur kontaktet me Tozajn prej dy-tre ditësh, pavarësisht përpjekjeve të vazhdueshme për ta telefonuar. Sipas tij, gazetari kishte njoftuar se do të zhvillonte një transmetim të drejtpërdrejtë në orën 22:00, ku do të publikonte informacione që i cilësonte si zbulime të rëndësishme, por më pas nuk ishte përgjigjur më në telefon.

Vrenozi tha se fillimisht kishte menduar se Tozaj mund të kishte pasur probleme shëndetësore, madje kishte dyshuar se mund të ndodhej në spital. Situata e kishte shqetësuar edhe Elton Ilirjanin, i cili gjithashtu ishte interesuar për fatin e gazetarit.

Megjithatë, gjatë një diskutimi televiziv, Vrenozi hodhi edhe një tjetër pistë, duke pretenduar se mungesa e Tozajt mund të lidhej me një surprizë televizive. Sipas një informacioni që i kishte përcjellë një mik, gazetari mund të ishte banori më i ri i spektaklit “Big Brother VIP Kosova”. Ky pretendim, megjithatë, nuk është konfirmuar zyrtarisht nga produksioni.

Përgjigjja që pritej për të sqaruar situatën erdhi nga nëna e gazetarit. Ajo konfirmoi se kishte komunikuar me të birin dhe se ai ishte në gjendje të mirë shëndetësore.

“Po, sapo kam folur me Eltonin. Është mirë nga gjendja shëndetësore”, deklaroi ajo, duke qetësuar kështu shqetësimet e ngritura për fatin e tij.

Deri më tani, nuk ka një informacion të qartë mbi vendndodhjen e Tozajt apo arsyet që e kanë mbajtur larg komunikimit me personat e afërt. Gazetari ka qenë së fundmi në qendër të vëmendjes për shkak të deklaratave dhe akuzave ndaj disa figurave publike, përfshirë kompozitorin Adrian Hila, pretendime që nuk janë konfirmuar nga institucionet përkatëse.

Për momentin, familja ka konfirmuar se Elton Tozaj është mirë me shëndet, ndërsa mundësia e përfshirjes së tij në një format televiziv mbetet ende e pakonfirmuar.