Fushata e rekrutimit për Forcat e Armatosura ka mbërritur edhe në Gjirokastër, ku është konstatuar interesim nga të rinjtë për t’u bërë pjesë e ushtrisë, me një pjesëmarrje të veçantë të vajzave.
Pjesë e aktivitetit informues ishte edhe ekspozita e armëve dhe pajisjeve ushtarake, e cila u mundësoi të rinjve të njiheshin nga afër me armatimin dhe mjetet që përdoren nga Forcat e Armatosura.
Në kuadër të kësaj fushate, Ministria e Mbrojtjes ka hapur 250 vende vakante për ushtarë dhe detarë aktivë, duke synuar tërheqjen e të rinjve që dëshirojnë të ndërtojnë një karrierë ushtarake.
Gjatë takimeve, të interesuarit u informuan mbi kriteret e aplikimit, mundësitë e karrierës dhe përfitimet që ofron shërbimi në Forcat e Armatosura.
Interesimi i vajzave ishte një nga elementët që ra në sy gjatë aktivitetit, duke dëshmuar se uniforma ushtarake po shihet gjithnjë e më shumë si një mundësi karriere edhe nga të rejat.
Top Channel
