Presidenti i Ukrainës, Volodymyr Zelenskyy, deklaroi të enjten se forcat e armatosura ukrainase po përballen sërish me pengesa në funksionimin e shërbimit të internetit satelitor “Starshield”, i operuar nga kompania “SpaceX” e miliarderit Elon Musk.

Përmes një reagimi të publikuar në internet, kreu i shtetit ukrainas bëri me dije se “njësitë tona kanë regjistruar ndërprerje të konsiderueshme në operacionet e Starshield mbi territorin e Ukrainës për disa ditë tani”. Sipas tij, këto vështirësi nuk janë “gabime të rastësishme”, por “kufizime sistematike të shpejtësisë”.

Zelenskyy paralajmëroi se dobësimi i këtij rrjeti komunikimi ka pasoja të drejtpërdrejta në fushëbetejë dhe po cenon mbrojtjen e vendit.

“Për fat të keq, kjo po i ndihmon rusët të vrasin më shumë ukrainas dhe të kryejnë sulme më të sakta kundër Ukrainës”, theksoi ai.

Sistemi “Starshield” — versioni i nivelit ushtarak i rrjetit të njohur satelitor “Starlink” — përbën një element jetik për koordinimin dhe komunikimet e ushtrisë ukrainase në vijën e parë të frontit.

Kjo nuk është hera e parë që Kievi raporton vështirësi të tilla. Problemet e para u sinjalizuan muajin e kaluar, menjëherë pas një mosmarrëveshjeje mes presidentit Zelenskyy dhe presidentit të SHBA-së, Donald Trump, lidhur me një marrëveshje amerikane që lejonte rritjen e sasisë së naftës ruse në tregjet globale.

Në atë kohë, e përditshmja “Wall Street Journal” raportoi se Musk “vendosi një kufi shpejtësish me të cilat pajisjet ukrainase mund të qëndronin të lidhura me rrjetin satelitor”. Ndonëse si Elon Musk ashtu edhe Donald Trump mohuan fillimisht kufizimin e aksesit, Musk më vonë akuzoi palën ukrainase për përdorimin e shërbimit për qëllime ushtarake, ndërsa presidenti Trump deklaroi se miliarderi i teknologjisë e kishte “rivendosur atë”.

/rtsh.al/