Ish-kryediplomati i Kosovës, Enver Hoxhaj, ka prezantuar përvojën e shtetndërtimit të Kosovës në kuadër të “Slemani Strategic Forum”, të organizuar nga Qeveria e Rajonit të Kurdistanit të Irakut.
Gjatë fjalës së tij në forum, Hoxhaj ka folur për rolin e Shteteve të Bashkuara të Amerikës dhe Bashkimit Evropian në ndërtimin e Kosovës së pavarur.
“Kosova është model i shtetndërtimit me mbështetje amerikane dhe evropiane”, ka shkruar Hoxhaj në Facebook, ku ka publikuar edhe një pjesë të fjalimit të tij në këtë forum.
Deputeti i PDK-së ka theksuar se politika e jashtme e një vendi nis me fqinjët, ndërsa bashkëpunimin rajonal e ka cilësuar si domosdoshmëri ekonomike.
Gjatë ditës së sotme, në margjinat e forumit në Slemani, Hoxhaj është takuar me Kiril Petkovin, ish-kryeministër të Bullgarisë, si dhe me Ali Babacanin, ish-zëvendëskryeministër dhe ish-ministër të Jashtëm të Turqisë.
Para pjesëmarrjes në forumin e Slemanit, Hoxhaj kishte qenë folës në Konferencën e Sigurisë në Berlin, ndërsa kishte marrë pjesë edhe në Samitin e Aleancës Ndërparlamentare për Kinën (IPAC) në Hagë, në cilësinë e anëtarit të kësaj aleance.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2026 Gazeta Online Insajderi - Të gjitha të drejtat e rezervuara.
